Аныгы библиотека хайдах буолуохтааҕын киин куоракка ырыттылар

Комментарии Спорт и культура

Поделиться:

НВК САХА –  От ыйын 23 күнүгэр Национальнай библиотека Историческай саалатыгар спикердэр 2024 сылга диэри Саха сиригэр библиотека үлэтин сайыннарыы кэнсиэпсийэтигэр тирэх буолуохтаах ньымалары кэпсэттилэр. Бу туһунан СӨ Национальнай библиотекатын пресс-сулууспата иһитиннэрдэ.

Мунньахха уопсастыбаннаһы кыттыһыннардылар. Модераторынан СӨ култуура уонна духуобунай сайдыы миниистирин бастакы солбуйааччыта Владислав Левочкин буолла.

Бэлиэтээн эттэххэ, Саха Өрөспүүбүлүкэтин бырабыыталыстыбатын бэрэссэдээтэлэ Владимир Солодов сорудаҕынан Национальнай библиотека Саха сирин библиотекаларын сайыннарыы кэнсиэпсийэтин оҥорорго үлэлэһэр.

 

“Өрөспүүбүлүкэ библиотекаларын тиһилигэ балачча сайдан турар. Саха сирин үрдүнэн 504 библиотека үлэлиир. Библиотека дьыалатыгар билигин уустук кэм үүннэ. Онон сөпкө, хайдах баарынан маны сыаналаан, салгыы сайдар туһунан толкуйдуохтаахпыт. Саха сирин хас биирдии олохтооҕо өй-санаа өттүнэн сайдарыгар библиотека туох оруоллааҕын быһаарыахтаахпыт”, – диэн ыам ыйын 26 күнүгэр библиотекаҕа буолбут мунньахха Владимир Солодов этэн турардаах.

 

Бырабыыталыстыба бэрэссэдээтэлэ СӨ Национальнай библиотеката оҥорор өҥөлөрүн үрдүктүк сыаналаабыта. Ол курдук манна кинигэни эрдэттэн сакаастыахха, бэчээт таһаарыыларын көмпүүтэргэ киллэриэххэ, ону таһынан 15 тыһыынчаттан тахса экземпляры онлайн ааҕыахха сөп. Ону таһынан Национальнай библиотекаҕа аан дойду ханнык баҕар тылынан суруллубут кинигэтин көҥүл ааҕыахха сөп, маныаха порталга сайаапка хаалларар эрэ наада. Бу курдук өҥө бүтүн дойду үрдүнэн аҕыйах.

 

“Аныгы үйэ сиэринэн библиотекалар иннин диэки баран иһиэхтээхтэр. Библиотека дьиэтин иһин бүтүннүү уларытартан куттанар сатаммат. Ол курдук айар-тутар дьоҥҥо аналлаах туспа миэстэлэр тэрилиннэхтэринэ, оҕолор да, улахан да дьон, кинигэ ааҕартан ураты, сөбүлүүр дьарыктарынан дьарыктаныахтарын сөп буолуо этэ”, – диэн Солодов санаатын үллэстибитэ.

 

Библиотека үлэһиттэрэ өрөспүүбүлүкэ салалтатын сорудаҕын ылаат, дьон санаатын истэргэ уонна кэнсиэпсийэни оҥорорго үлэлэһэллэр.

Ол курдук бэс ыйыттан от ыйын бүтүүтүгэр диэри библиотекардар улахан социологическай чинчийии ыыттылар. 22 тыһыынча кэриҥэ киһи санаатын иһиттилэр. Маны таһынан экспертэртэн кэккэ интервьюну ыллылар. Экспертэр, биллэр-көстөр дьон  “Аныгы библиотека хайдах буолуохтааҕый?” диэн ыйытыыга санааларын үллэстибиттэрэ,  хайдах  салгыы сайдыахтааҕын туһунан бэйэлэрин көрүүлэрин кэпсээбиттэрэ.

 

 

От ыйын 23 күнүгэр буолбут мунньах түмүгэр библиотекалар үгэс буолбут үлэлэрин сүтэриэ суохтаахтар, ол эрээри сыыппара үйэтигэр олорорбут быһыытынан, салгыы сайдыах тустаахтар диэн санааҕа кэллилэр.

Этиллибит тезистэргэ уонна нэһилиэнньэ ыйытыгар олоҕуран, 2024 сылга диэри өрөспүүбүлүкэҕэ библиотека дьыалатын сайыннарыы биир кэлим кэнсиэпсийэтэ оҥоһуллуо.

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

2 − два =

ЛЕНТА НОВОСТЕЙ