Саха сиригэр оскуола ахсын цифровой эйгэ олохтонуо

Комментарии От редакции

Поделиться:

НВК САХА – Хатас оскуолатын оҕолоро, робототехниканы, IT-технологияны таһынан, өссө хайдах гынан өлгөм үүнүүнү хомуйуохха сөбүн чинчийэллэр.

Агротехнология лабораториятыгар сааскы түбүк үгэнэ. Оҕолор номнуо биэрэс, оҕурсу, помидор – 6,5 тыһыынча араскыыны олордубуттар. Үүнээйилэрин кыргыттар ый курдугунан тэпилииссэҕэ көһөрөн, илиинэн уу кутан, буорун көбүтэн бүөбэйдэһиэхтэрэ.

Аныгы оборуудабанньалары Хатас оскуолата федеральнай граны ылан холбуоҕа. “Хас биирдии оҕо ситиһиитэ” диэн национальнай бырайыагы сүүмэрдээһиҥҥэ дойду үрдүнэн сэттэ оскуола биһирэннэ, ол иһигэр хатастарга алта мөлүйүөн ананан, база лаппа тупсуохтаах.

“Робототехника” диэн куруһуокка оҕолорбут тыа хаһаайыстыбатыгар олордор оруобаттары оҥоруохтаахтар”, – диэн Хатас оскуолатын дириэктэрэ Николай Слепцов бэлиэтээтэ.

Бэлиэтээн эттэххэ, “Аныгы оскуола” диэн бырайыагынан быйыл 54 цифровой уонна гуманитарнай хайысхалаах кииннэр тэриллиэхтэрэ. Мэҥэ Хаҥаласка Майатааҕы лицейгэ уонна Майа орто оскуолатыгар былаанныыллар.

“Үс улахан хайысханан үлэлиэхтээхтэр. Ол курдук интегрированнай, математика уонна информатика, ОБЖ, физкультура, технология бырагыраамаларынан”, – диэн Мэҥэ Хаҥалас улууһун үөрэх салалтатын уопсай үөрэхтээһин салаатын начаалынньыга Александра Луковцева эттэ.

Оҕо аймахха билиини иҥэрии учуутал быһаарыытынан эрэ муҥурдаммат, уһуйааччы аныгы технологияны баһылаан, үлэтигэр мэлдьи туһаныахтаах. Ол иһин оскуола ахсын цифровой эйгэ олохтонуо. Саҥа саҕалааһыҥҥа бу сылга 15 улуус ылсыаҕа. Ити эрээри ол сибээс хаачыстыбатын кытта ыкса ситимнээх.

“Бырагыраамалар хачайдамматтар, онон наадалаах матырыйааллары сатаан ылбаттар. Биһиги “Ростелеком” хампаанньаны кытта үлэлэһэбит. Онон өрөспүүбүлүкэ оскуолалара 100% хабыллыахтаахтар”, – диэтэ үөрэх, наука миниистирин бастакы солбуйааччыта Ирина Любимова. 

Ордук ыраах, чиэски сирдэргэ билигин интэриниэт куйаарыгар холбоно охсор кыаллыбат.

Ону таһынан учуутал идэтин таһымын үрдэтии национальнай бырайыактарга ыйылла сылдьар. Күн бүгүн Саха сиригэр 14 тыһыынчаттан тахса педагог үлэлиир буоллаҕына, кинилэр 100% билиилэрин-көрүүлэрин хаҥатар, араас куурустарга сылдьар усулуобуйата тэриллиэҕэ.

Орто анал үөрэх кыһаларын үлэтэ эмиэ сайдыыны кытта тэҥҥэ үктэһиэхтээх. Ол аата материальнай-техническэй базаны сэргэ уһуйуу-такайыы ньымата уларыйыахтаах.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

один × один =

ЛЕНТА НОВОСТЕЙ