Бүгүн – Кытай тылын күнэ. Саха сиригэр төһө бу тылы үөрэтэллэр? (ВИДЕО)

Комментарии Образование и здравоохранение

Поделиться:

NVK-ONLINE.RU – Бүгүн – Кытай тылын күнэ. Россияҕа бу күн 2010 сылтан бэлиэтэнэр. Бу күн Кытай суругун-бичигин төрүттээччи Цан Цзе аатыгар анаммыта. Дойду экономическай сайдыытыгар Кытай республикатын кытта сыһыаны бөҕөргөтөргө, кэскиллээх үлэни тэрийэргэ Кытай тылын үөрэтэр инники суолталаах. Билигин Кытай тылын үрдүк эрэ үөрэх кыһатыгар буолбакка, оскуолаҕа эмиэ үөрэтэллэр.

Кытай хэйлунцзянскай университетын уһуйааччыта У Ли Саха сиригэр ааспыт күһүн кэлбитэ. Калмыкияҕа, Санкт-Петербурга сылдьан, Кытай тылын үөрэтэн баран, Хотугулуу-Илинни федеральнай университекка кэлэн үлэлии сылдьарыттан олус астынар, Саха сирин олус сөбүлээбит.

Үрдүк үөрэх кыһатыгар 4 сыл устата үөрэммит оҕолор илиҥҥи омуктар тылларын үөрэтэн баран, ордук Кытай тылын кэскиллээх, инникилээх диэн санааттан талан үөрэтэллэр. Кытай тылыгар 60-ча тыһыынча иероглиф баарыттан үөрэхтээх киһи 6-8 тыһыынча иероглифы биллэҕинэ ааҕар, суруйар, дьону кытта кэпсэтэр кыахтанар диэн кэпсииллэр.

Саха сирэ Кытай дойдутун кытта ыкса үлэлэһэр. Култуура, үөрэх, спорт эйгэтигэр сыһыаннаһыы олохтоммута ыраатта. Кэлиҥҥи кэмҥэ ордук экономическай сайдыы уонна инвестиционнай сибээс хайысхатыгар үлэ барар.
Онуоха бу институту бүтэрбиттэр учууталынан да, тылбаасчытынан да үлэлииллэр. Үрдүк үөрэхтээх, киэҥ билиилээх тылбаасчыт баар буоллаҕына, оҥоһуллубут бырайыак кэскиллээх буолан, олоххо киириэхтэрэ.

Улуу Кытай тылын үрдүк үөрэх эрэ кыһатыгар буолбакка, оскуола боруогуттан үөрэтэн саҕалыыллар. Күн бүгүн федеральнай судаарыстыбаннай үөрэх стандарта икки омук тылын тэҥинэн үөрэтэргэ кыах биэрэр. Онуоха оскуола бэйэтэ талан үөрэтэр.

Билигин республика үрдүнэн уопсайа 700-тэн тахса оҕо Кытай тылын үөрэтэр. Кэлэр үөрэх дьылыгар икки оскуолаҕа – Дьокуускайга Саха гимназиятыгар, Хаҥалас улууһун Ой орто оскуолатыгар саҥа сүүрээн быһыытынан лингафоннай тэрил туруорар былааннаахтар.

Аан дойдуга бары өттүнэн сайдыылаах улуу Кытай тылын, суругун-бичигин үөрэтии республика эрэ буолбакка, дойду экономическай, политическай сайдыытыгар кэскиллээх бырайыактарга ылсарыгар төһүү буолуо.



Поделиться:




Добавить комментарий

Ваш e-mail не будет опубликован. Обязательные поля помечены *

пять + 12 =

ЛЕНТА НОВОСТЕЙ