Бүлүүгэ хаһаайыстыбалар кыстыыр отторо тиийбэккэ, атыылаһан эрэллэр (ВИДЕО)

Комментарии Экономика и сельское хозяйство

Просмотров: 34

NVK-ONLINE.RU – Бүлүү улууһугар быйыл от аанньа үүммэккэ, хаһаайыстыбалаах дьон атыылаһарга тиийдилэр . Ол курдук бу күннэргэ тиэйии, таһыы үлэтэ Сыдыбыл нэһилиэгин Ампаардаах хаһаайыстыбатыгар саҕаланна.

Ампаардаах хаһаайыстыба эбии от ылыннаҕына эрэ, уһун кыстыгы этэҥҥэ туоруур балаһыанньата үөскээтэ. Ол курдук бу сайын окко былаан туолбакка, күн бүгүн хаһаайыстыба 200 тоннаны атыылаһар туһунан өрүс уҥуор Тылгыны итиэннэ Өкүндү нэһилиэктэрин кытта илии баттаһан олорор.

Сайын курааннаан, күһүн эрдэ тымныйан, Бүлүү оройуонугар от үлэтэ ыараханнык ааспыта, нэһилиэктэр былааннарын толорбокко, үгүс хаһаайыстыбаҕа билиҥҥитэ от тиийбэт куттала үөскээн турар. Ити эрээри тыа хаһаайыстыбатын Министиэристибэтиттэн итиэннэ улуус дьаһалтатыттан тиэйии-таһыы үлэтигэр харчы көрүллэн, ынахтаах дьон санаалара бөҕөх.

Оройуон таһыттан эттэххэ, Амматтан, Кэбээйиттэн толору рулоннаммыт оту тиэммит улахан массыыналар аны сотору кэминэн утуу-субуу кэлэн барыахтара. Оччотугар Бүлүүгэ быйылгы кыстык этэҥҥэ ааһыа.



Добавить комментарий

Ваш e-mail не будет опубликован. Обязательные поля помечены *