Бүлүүгэ оҕунан ытыы тренерэ спортсменнары тиэргэнигэр эрчийэр

Комментарии От редакции

Поделиться:

НВК САХА – Бүлүү улууһугар Бөтүҥ нэһилиэгиттэн успуорт оҕунан ытыы саҕаламмыта. Ол курдук тренер Егор Соловьев дьарыктыыр спортсменнара кылгас кэм иһигэр үрдүк көрдөрүүлэннилэр. Онуоха нэһилиэккэ успуорт саалата суоҕа үлэни атахтыыр, ол да буоллар, дьарык тохтообот, күн бүгүн тренер спортсменнары тиэргэнигэр эрчийэр.

Оноҕостор көтөллөр, сыалы таба түһэллэр. Ити курдук сылтан ордук эрэ кэм иһигэр дьарыктаммыт Наташа Трофимова көрдөрүүтэ үчүгэй, успуорт маастарыгар кандидакка тиийэ үүннэ.

“Бастаан кыратык ыарырҕатар этим. Онтон эрчиллэн истэххэ, чэпчээн иһэр курдук. Быйыл Россияҕа бастыыр иһин күрэххэ бара сылдьыбытым, успуорт маастарыгар кандидат нуорматын толорбутум. Үөрэхпин бүтэрэн баран, салгыы оҕунан дьарыктаныахпын баҕарабын”, – диир Наташа.

Бөтүҥ нэһилиэгэр успуорт саалата хаһыс да сылын сабыллан турар. Онон нэһилиэк олохтоохторо успуордунан дьарыктаналларыгар ыарахаттары көрсөллөр. Ол курдук баҕалаахтар бириэмэнэн оскуолаҕа эрчиллэллэр, бу үөрэх эрэ кэмигэр, оттон охчуттар дьарыктарын тохтоппоттор, билигин тренер Егор Соловьев тиэргэнигэр сылдьаллар.

“Бүлүү куоратыгар эмиэ дьарыктыы сылдьабын. Онно эмиэ үчүгэй оҕолор бааллар. Кэккэ ситиһиилэрдээхпит, билиҥҥи туругунан, икки успуорт маастара, сэттэ Россия успуордун маастарыгар кандидаттар иитиллэн таҕыстылар. Аммаҕа ыытыллыбыт оонньууларга кыттан кэллибит. Онно эмиэ ситиһиилэрдээхпит. Хамаанданан иккис миэстэ буоллубут. Валентина Евдокимова үһүс миэстэҕэ тигистэ”, – диэн Егор Соловьев кэпсээтэ.

Тохсус кылааһы бүтэрбит Богдан Чиряев хас да сыллаах, сыралаах үлэтин түмүгэ – кини күн бүгүн Саха сирин сүүмэрдэммит хамаандатын чилиэнэ. Ол курдук кэлэр ыйга Читаҕа буолуохтаах охчуттар Россиятааҕы чөмпүйэнээттэригэр бэлэмнэнэр, маастар нуорматын толорордуу былааннанар.

Бүлүү улууһугар оҕунан ытыы федерацията биэс сыл субуруччу бастыҥынан ааттанна, көрдөрүү үчүгэй, ситиһии кэлэ турар. Онтон бу барыта, биллэн турар, кырата суох үлэттэн тахсар.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

двадцать + 16 =

ЛЕНТА НОВОСТЕЙ