«Бэйбэрикээн» остуоруйа киинэтэ кулун тутарга тахсыа

Комментарии Главные новости, От редакции

Поделиться:

НВК САХА – “Биэс ынахтаах Бэйбэрикээн эмээхсин” күөх экраҥҥа көстүөҕэ. Кулун тутар 21 күнүгэр “Бэйбэрикээн” остуоруйаҕа олоҕуран уһуллубут уус-уран киинэ көрөөччү дьүүлүгэр тахсар.

Оҕо-аймах тапталлаах остуоруйата “Биэс ынахтаах Бэйбэрикээн эмээхсин” саҥалыы тыыннанан таҕыста. Режиссер Константин Тимофеев хартыыната саха норуота уос номоҕо оҥостон кэлбит остуоруйатыгар олоҕуран уһулунна. Маныаха эбии саҥа cэргэх персонажтар – мэлдьи таабырын таайтарар Тайаана Куо, Хаардьыт Бэргэн доҕор уола, дулҕалаах күөллэр иччилэрэ киирдилэр.

Киинэни оҥорооччулар саха киинэтигэр дьиэ кэргэҥҥэ аналаах жанр тиийбэтин бэлиэтииллэр. Оҕо кыра сааһыттан саха култууратын, үгэһин билэ үөрэнэригэр бэйэбит төрүт остуоруйаларбытыгар олоҕуран уһуллубут киинэ, биллэн турар, төһүү күүс буолар. Онон киинэни остуоруйа ис хоһоонуттан туорааһына суох уһуллулар. Бэйбэрикээн эмээхсин кыыһын эдэр артыыска Оля Дорофеева оонньуур.

Киинэҕэ биир ураты көстүү баар – урукку кэм эйгэтин үөскэтэр “бохо” истииллээх көстүүмнэр. Аныгы үйэ оҕото көрөрүгэр ураты тыыннаары, режиссер бу истиили талбыт. Бэйбэрикээн эмээхсини итэҕэтиилэхтик толорбут Зоя Попова артыыс оруолун арыйарыгар көстүүмэ сүҥкэн суолталааҕын бэлиэтиир.

Хартыына былырыын сайын Уус Алдан улуууһун Суоттутугар кэрэ айылҕалаах Доҕордоһуу түмэлин заповеднигар уһуллубута. Артыыстар бу киинэҕэ уһуллаары, саха төрүт дьарыгар сыһыннылар. Хаардьыт Бэргэни толорор Владимир Михалев киинэҕэ оонньуур кэмигэр оҕунан ытарга үөрэммит.

“Биэс ынахтаах Бэйбэрикээн эмээхсин” кулун тутар 21 күнүттэн киин куорат, улуустар киинэ тыйаатырдарыгар көстүөҕэ. Оҕо киинэтэ сайдарыгар болҕомто суоҕа атахтыыр диэн киинэни оҥорооччулар бэлиэтииллэр. Инникитин саха, эбэҥки, юкагир остуоруйаларын киинэ оҥорор баҕалаахтар.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

9 + пятнадцать =

ЛЕНТА НОВОСТЕЙ