Биир кэлим эксээмэн сайабылыанньатын олунньу 1 күнүгэр диэри туталлар

Комментарии Образование и здравоохранение

Поделиться:

НВК САХА – Биир кэлим эксээмэни туттарар туһунан сайабылыанньаны тиксэрэргэ икки нэдиэлэ хаалла. 11-с кылаас оҕолоро уонна ааспыт сылга оскуоланы бүтэрбиттэр олунньу 1 күнүгэр диэри чопчу быһаарыныахтаахтар. Маныаха үрдүкү кылаас оҕолоро сайабылыанньаларын үөрэнэр кыһаларыгар, оттон урукку сылларга бүтэрбиттэр үөрэх салалтатыгар биитэр чугастааҕы оскуолаҕа биэрэллэр.

Иккис нүөмэрдээх оскуолаҕа 150-чэ оҕо эксээмэҥҥэ киирээри, кичэйэн бэлэмнэнэр, сайабылыанньаларын бары биэрбиттэр. Оттон бу үөрэх кыһата – түмүк тургутууну ыытар улахан пууннартан биирдэстэрэ. Сыллата атын сиртэн манна 200-тэн тахса ыччат түмсэн, билиитин бэрэбиэркэлэнэр.

“Билигин, бастатан туран, тэрийээччилэри бэлэмнии сылдьабыт. Кинилэр олус улахан эппиэтинэһи сүгэллэр, тоҕо диэтэххэ, былырыыҥҥыттан оҕолорго эксээмэн ыытар матырыйааллар аудитория иһигэр бэчээттэнэллэр”, – диэтэ Дьокуускай куорат 2-с нүөмэрдээх оскуолатын дириэктэрин үөрэх, иитии чааһыгар солбуйааччы Саргылана Бродникова.

Кэлим эксээмэн бэрээдэгэр быйыл да кэккэ уларыйыылар киирдилэр. Ол ахсаан предметигэр сыһыаннаах. Өскөтүн урут профильнай итиэннэ алын кирбиини иккиэннэрин туттарар буоллахха, билигин чопчу биирин эрэ талаҕыҥ. Өссө баҕалаах дьон Кытай тылын төһө билэллэрин быһаарыахтара.

“Оскуолаҕа икки омук тылын үөрэтии булгуччулаах буолуохтаах. Ол иһин оскуолалар бу саҥаны киллэриигэ билиҥҥиттэн бэлэмнэниэхтээхтэр”, – диэн СӨ Үөрэх уонна наука миниистирин 1-кы солбуйааччыта Ирина Любимова бэлиэтээтэ.

Былырыыҥҥы үөрэх дьылыгар 8 тыһыынчаттан тахса киһи эксээмэни ааспыта, быйыл да оччо буолуо диэн сабаҕаланар.

Хотугулуу-Илиҥҥи федеральнай үнүбэрситиэт үрдүк үөрэххэ бэлэмниир уочараттаах дьарыга. Уһуйааччылар кэлим тургутуу уустук сорудахтарын биэрэн, ыччаты үөрэтэллэр.

Факультекка эдэр дьону икки болдьоххо арааран такайаллар. Билиҥҥитэ 80-ча киһи сылдьар. Бары ааспыт сылга оскуоланы бүтэрбиттэр. Маны тэҥэ 11-с кылаас оҕолоругар туһунан дьарыгы тэрийэллэр.

“Кэлэр ыйтан “Интенсив-курс” диэн үс ыйдаах куурус аһыллаары турар, онно номнуо сайабылыанньалары хомуйаллар. Бэлэмнэниэн баҕалаах оҕолор кэлэн суруттарыахтарын сөп”, – диэтэ ХИФУ үрдүк үөрэххэ бэлэмниир, идэҕэ туһаайар факультетын исписсэлииһэ Евгения Шеломова.

Кэлим эксээмэни туттарыы – биир эппиэттээх түгэн. Маныаха олунньу 1 күнүгэр диэри ким ханнык предмети талбытын быһаарына охсуохтаах. Куоттардыҥ – уопсай испииһэккэ хабыллыбаккын.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

восемнадцать + девять =

ЛЕНТА НОВОСТЕЙ