Булуҥҥа сайын үлэлиэн баҕалаах оҕо ахсаана элбиир

Комментарии Образование и здравоохранение

Поделиться:

НВК САХА – Тиксиигэ улуустааҕы дьарыктаах буолуу киинэ 14-18 диэри саастаах оҕолорго дьаарбаҥка тэрийбитэ. Сайыҥҥы кэмҥэ үлэ миэстэтинэн 70 үөрэнээччи хааччыллыаҕа. Кэнники кэмҥэ уһун сынньалаҥҥа үлэлиэн баҕалаах ахсаана элбиирэ бэлиэтэнэр диэн Булуҥ улууһун дьарыктаах буолуу киинин салалтата иһитиннэрэр.

«Дьаарбаҥкаҕа 20-тэн тахса үөрэнээччи кэлэн сүбэ-ама ылан барбыт. Сайыҥҥы уһун сынньалаҥнарын кэмигэр үлэлиэн баҕалаах оҕолорго «Тиксии бөһүөлэгэ» дьаһалтатын дьиэтигэр  үгүс үлэ миэстэтэ тахсар. Тиксии оскуолаларыттан бүгүҥҥү тэрээһиҥҥэ үксүн 9 кылаас үөрэнээччилэрэ кэлэн бардылар», – диэн улуустааҕы дьарыктаах буолуу киинин үлэһитэ Татьяна Бурцева иһитиннэрдэ.

Сайыҥҥы кэмҥэ үлэ миэстэтинэн быйыл 70 оҕо хааччыллыахтааҕын улуустааҕы Дьарыктаах буолуу киин дириэктэрэ Егор Данилов этэр. Ол курдук 10 оҕо ыстаадаҕа тахсан үлэлиэ, 10 оҕо Күһүүрдээҕи орто оскуола теплицатыгар, оҕуруокка үлэлээн көмөлөһүөхтэрэ уоннааҕылар Күһүүргэ, Таймылыырга уонна Тиксиигэ бөһүөлэктэри тупсарыы бырайыагар кыттыһан хамнас аахсыахтара. Ону таһынан Тиксии бөһүөлэгэр, култуурунай-спортивнай комплекс уонна Тиксиитээҕи Морпорт тэрилтэлэрэ иккилии оҕону ыланнар, сири-уоту тупсарарга, ыраастыырга үлэлэтиэхтэрэ.

Кэлиҥҥи сылга оҕо бэйэм үлэлиэхтээхпин диирэ элбээбитин Егор Хрисанфович бэлиэтиир. Омуннаан эттэххэ, төрөппүттэр дьарыктаах буолуу киинин тэрилтэтиттэн үлэ туһунан бу кыһыҥҥыттан сураспыттар. Чуолаан оҕолор муус устар ыйтан үлэҕэ көхтөөхтүк суруйтаран барбыттара этиллэр. Онон маннык түмүк тустаах үлэһиттэри үөрдүбүтүн, соһуппутун киин дириэктэрэ этэр.

«Атын улуустары көрдөххө, төттөрүтүн оҕо үлэлиэн баҕарара аччыы турар курдук көстөр. Онтон биһиэхэ, Булуҥ улууһугар, улаатан эрэр оҕолор үлэҕэ күүскэ туруммуттар. Маннык үлэлээн оҕолор тутулуга суох, ким да көмөтүн күүппэт, бэйэлэрин бэйэлэрэ быһаарынар дьон буола улааталлар. Ылан көрдөххө, урут кыанар ыал оҕото куруук үлэ миэстэтин ыйыта кэлэр эбит буоллаҕына, билигин атын хартыына. Элбэх оҕолоох ыаллар оҕолоро, соҕотох оҕолор кэлэллэрэ үксээтэ, бу киһини үөрдэр. Маннык хамсааһын салҕана турдун, оччоҕуна сайдыы барыа этэ», – диэн оҕо сайыҥҥы үлэтин туһунан Егор Хрисанфович билиһиннэрдэ.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

десять + 3 =

ЛЕНТА НОВОСТЕЙ