Бырааһынньык күннэригэр балык ыраастыы сылдьан эчэйбит киһи үксээтэ (ВИДЕО)

Комментарии Образование и здравоохранение

Просмотров: 95

Бырааһынньык уһун өрөбүллэригэр эмчит көмөтүгэр наадыйааччы элбиир. Хаан баттааһына халбанныыр, илиини-атаҕы эчэппит да элбэх. Маныаха суһал көмө станцията күүһүрдүллүбт режимҥэ, оттон поликлиникалар график быһыытынан тохтообокко үлэлииллэр

Суһал көмө станциятыгар күнүстэри-түүннэри телефон оргуйан олорор. Бырааһынньык уһун өрөбүллэригэр, ыалдьыбыт дьонтон төгүрүк сууккаҕа 600-кэ тиийэр ыҥырыы киирэр.
Хаан баттааһына үрдүүр, эмискэ ис-үөс ыалдьар. Онно суһал көмө станциятын сүүрбэ үс биригээдэ хардары-таары көмөҕө барар. Күүскэ ыалдьыбыт киһиэхэ сүүрбэ мүнүүтэнэн тиийэллэр. Арыый халымыр буоллаҕына, икки чаас иһинэн көмө оҥороллор. Дьэ маныаха техниканан хааччылыы үүммүт сылтан арыый тупсуохтаах.
Травматалогия пууна эмиэ төгүрүк суукка эргиччи үлэлиир. Халтарыйан илиитин-атаҕын эчэппит, аһыы утаҕы амсайан баран, моһуогурбуттар бааллар. Өссө тоҥ балыгы астаары, сыыһа-халты туттан эмтэтэ-бэрэбээскилэтэ кэлээччи элбэх. Күҥҥэ ортотунан 70-80 киһи көрдөрөр.

Бырааһынньык өрөбүллэригэр поликлиникалар сарсыарда 9 чаастан үскэ диэри ааннара аһаҕас.
Билигин оҕолор-улахан да дьон үксүгэр тымныйан ыалдьаллар диэн эмчиттэр быһаараллар. Ол гынан баран кэлиҥҥи кэмҥэ ГРИПП өрө туран эрэр. Бастакы нүөмэрдээх поликлиникаҕа күн ахсын сүүстэн тахса оҕо көрдөрөр.
Күн бүгүн поликлиникаларга түөрт педиатр, эмиэ соччо терапевт быраас дьуһуурустубалыыллар. Онтон сарсын кинилэри таһынан атын специалистар дьону көрүөхтэрэ.
Өрөбүл-сынньалаҥ күннэри аахсыбакка, үрүҥ халааттаах аанньаллар үлэ-түбүк үөһүгэр сылдьаллар. Кинилэр баҕа санаалара биир – дьон сэргэ этэҥҥэ, чэгиэн сырыттын диэн.



Добавить комментарий

Ваш e-mail не будет опубликован. Обязательные поля помечены *