Дьокуускай Табаҕатыгар сылгы таас өйдөбүнньүгү доҕор оҥостон, чааһы-чааһынан аттыгар турар

Комментарии От редакции

Поделиться:

НВК САХА – Бу күннэргэ социальнай ситимнэргэ Табаҕа бөһүөлэгиттэн соҕотох сылгы арахсыбат буолла диэн сурах киэҥник тарҕанна. “Саха” НКИХ устар бөлөҕө сылгы хаһаайынын кытта миэстэтигэр тиийэ сырытта.

Отучча сыл усталаах-туоратыгар ат ыҥыырыттан түспэтэх Павел Пестерев күн-бүгүн хаһаайыстыбатыгар алта сылгылаах. Аны саас күөххэ үктэниэххэ диэри тиийэр ото-маһа баар эрээри, сир-уот тиийбэтиттэн, эбиитин быһа түһүөхтэрэ диэн, хаайан-тутан эбии аһаппыта балачча буолла.

Кыһалҕа аҥардаастыы эрийбэт дииллэринии, аны Байбал баар-суох миинэр миҥэтэ Табаҕа бөһүөлэгиттэн арахсыбат диэн сурах-садьык санааҕа-онооҕо тэптэ. Хаһаайын оччолооҕу истэн, сүрэҕэ батарбат буоллаҕа.

Бу күннэргэ социальнай ситимнэри тилийэ көппүт иһитиннэрииттэн сиэттэрдэххэ, Хатас сылгыта ала-чуо биир сиргэ, Дьөһөгөй оҕотун таас өйдөбүнньүгүн таһыгар чааһы-чааһынан сылдьаахтыыр. Ол эрээри онно устар бөлөх тиийбитигэр, кураанах буолан биэрдэ. Оттон олохтоохтор этэллэринэн, сылгы барахсан үс сылтан бэттэх бу диэки эҥээрдэһэр эбит.

“Соҕотох сылгы куруук баар буолааччы, оҕолоох буоламмын, мээнэ тахсыбаппын. Биирдэ эмит таҕыстахпына, баар буолааччы”, – диэтэ Табаҕа бөһүөлэгин олохтооҕо  Светлана Лобанова.

Дьэ, онон ырааппата ини диэн, чугас эргин кэрийдилэр. Сэрэйбит-сэрэх, сыспай сиэллээх тураахтыыр эбит. 20-чэ сыл нэмнэрин билсибит доҕордуулар көрүстэхтэрэ ити.

“Сылгыбын туттум, солото суох буолан туппакка сылдьыбытым. Сылгым Хатырык диэн, 20-чэ сыл миинним, бэйэ-бэйэбитин бэркэ диэн билсэбит буоллаҕа дии”, – диэтэ Павел Пестерев. 

Ол эрээри Дьөһөгөй оҕото тоҕо чопчу биир сири буулаабыта дьикти. Барахсан кырдьан, үөрүттэн хаалан, таас өйдөбүнньүгү доҕор оҥоһуннаҕа дуу?

Саханы саха дэппит түөрэм туйахтаах саҥарбат эрэ айыылаах буоллаҕа, онон Хатырык барахсан хаһаайынын кытта дьиэлэригэр Хатаска тиэтэйэ-саарайа бараллар.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

девять − 6 =

ЛЕНТА НОВОСТЕЙ