Дьокуускайга дьиэ кирдээх, туһаныллыбыт ууга тимирэр

Комментарии Горячая линия

Поделиться:

НВК САХА – Дьокуускай Кирзавод оройуонугар Заводской уулуссатын 19/1 дьиэтин олохтоохторо кирдээх, туһаныллыбыт уу сытынан-сымарынан тыыналлар. Салайар хампаанньа үлэлээбэт буолбут. Оттон дьиэни 2023 сылга көһөрүөхтээхтэр.

Дьиэ подъеһыгар куруук уу нэлэйэн сытар, истиэнэлэрэ хайыта барбыттар. Бастакы этээс олохтоохторо көһөргө күһэллибиттэр. Иккис да этээскэ кыһалҕа аҕыйах буолбатах. Үөһээ этээс тохтон түһүө диэн дьон куруук кутталга сылдьар.

“Сыт-сымар ынырык. Оҕолорбут куруук ыалдьаллар”, – диэтэ дьиэ олохтооҕо Наталья Мельникова.  

Өссө биир олохтоох Лейла Абдуллаева дьиэтигэр кыайан киирбэт да, тахсыбат да буолбут.

“Куруук турар кыһалҕа. Дьиэбитигэр киирбэт да, тахсыбат да үлүгэрэ буолла. Бу хаптаһыны, дьиэбэр киирээри, соһон аҕалбыппыт. Уулуссаттан соһон аҕалан, сиргэ тэлгээбиппит. Онон, хата, дьиэбин буллум. Подъезка икки ыал олорор”, – диэн Лейла Абдуллаева санаатын үллэстэр.

Дьиэни 2015 сыллаахха хаарбах туруктаах диэн билиммиттэрэ. Бу оройуоҥҥа үлэлиир “Арктик-Строй” салайар хампаанньа эппиэтинэһиттэн аккаастанар. Олохтоохтору бэйэлэрин уонна “Теплоэнергия” хампаанньаны буруйдуур.

“Бу кэмҥэ диэри дьиэ хайдах эрэ сылыйан турбута. “Теплоэнергия” эмискэ баар буолбутун кэннэ сылыйбат буолбута. Олохтоохтор иэстэрэ хара баһаам. 100% хомунаалынай өҥө иһин төлөөн иһэллэрэ эбитэ буоллар, саатар  90%, дьиэҕэ хапытаалынай өрөмүөн ыытыа этилэр. Онно харчы тиийбэт”, – диэтэ “Арктик-Строй” дириэктэрэ Шамо Катам-Оглы Керимов. 

“Бу дьиэҕэ нэдиэлэҕэ иккитэ кэлэн барабыт, куруук кэтиибит”, – диэтэ “Теплоэнергия” хампаанньа сүрүн инженерин солбуйааччыта Василий Лепчиков. 

” Жилкомсервис” муниципальнай унитарнай тэрилтэ этэринэн, үлэһиттэр дьиэ септигин күннэри-түүннэри хачайдыыллар. Ол эрээри быһыы-майгы уларыйан көрбөт. Дьиэ тимирбитин курдук тимирэ турар. Дьон манна өссө биэс сыл олоруо турдаҕа. 2023 сылга көһөргө уочараттара кэлэр.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

3 + 11 =

ЛЕНТА НОВОСТЕЙ