Доруобуйаларыгар хааччахтаах оҕолор тустарынан саҥа клип сүрэхтээтилэр (ВИДЕО)

Комментарии Спорт и культура

Просмотров: 116

NVK-ONLINE.RU – Дьокуускайга “Тыын” диэн ааттаах ырыаҕа клип сүрэхтэннэ. Доруобуйаларыгар хааччахтаах оҕолор олохторун, олоххо дьулуһуулара , үтүөҕэ-кэрэҕэ талаһыылара күүстээҕэ көстөр. Бу клип “Харысхал” аһымал фонда 5 сыллаах үбүлүөйүгэр ананан оҥоһулунна.

Доруобуйаларыгар хааччахтаах оҕолор сырдык, кэрэ олоххо талаһыыларын, дьулуурдарын күүһэ үгүс дьону долгутар. Бу клип сүрүн ис хоһооно олоҕу хайдах баарынан ылынарга, таптыырга туһуланар.

Опера, эстрада ырыаһыттара ис сүрэхтэн долгуйан туран ыллаабыттара, оҕолор, доруобуйаларыгар хааччахтаах дьон кыттыбыттара ордук долгутар. Хартыынаҕа “Харысхал” аһымал фонда биэс сыллаах үлэтиттэн кадрдар туһаныллыбыттар.

Барыта 30-тан тахса киһи уһуллан, үгүс амарах санаалаах Айыы дьоно көмөлөһөн, клип олус табыллыбыт. Тыаһын-ууһун, музыкатын эдэр композитор, музыкант Николай Михеев танпыт, операторынан Семен Аманатов үлэлээбит, хартыынаны режиссер Михаил Лукачевскай оҥорбут.

4 кылаас үөрэнээччитэ Айталина Попова ырыа тылын бүтүннүү нойосуус үөрэтэн, ис хоһоонун өйдөөн, ис дууһатыттан олус долгуйан туран ыллаабыт. Доруобуйатыгар хааччахтаах киһи санаатын түһэрбэккэ, дьон ортотугар тэҥҥэ сылдьыахтаах диэн санаатын үллэстэр.

“Харысхал” аһымал фонда биэс сыл иһигэр үгүс үлэни ыытан кэллэ. Бу ырыа клибэр фонда уонна кинини тулалыыр дьон үлэлэрин биир санааҕа түмэр айылгылаах. Быйыл биэс посолу түмэн, тустаах дьоҥҥо көмөлөһөр өрүттээх үгүс үлэни ыытары былаанныыллар.

Үүммүт сыл Дьокуускайга үтүө санаа сылынан биллэрилиннэ. Онуоха бу клип сыл саҕаланыыта сүрэхтэммитэ ордук улахан суолталаах. Киһи сүрэҕинэн ылынар кылгас эрээри, дириҥ ис хоһоонноох клип үгүс дьону долгутуо, олоҕу таптыырга, тулалыыр эйгэҕэ ураты сыһыаҥҥа улахан олугу ууруоҕа.



Добавить комментарий

Ваш e-mail не будет опубликован. Обязательные поля помечены *