Үөһээ Бүлүү Боотулутугар уу ситимэ тардылларыгар тыа хаһаайыстыбатын министиэристибэтэ үп көрдө

Комментарии Экономика и сельское хозяйство

Просмотров: 26

НВК САХА – Үөһээ Бүлүү улууһун Боотулуу нэһилиэгэр өр сылларга сүрүн кыһалҕа буолбут иһэр уу кыһалҕатын быһаарарга, итиэннэ олорор сири-уоту тупсарыыга министиэристибэлэр кэмигэр үп-харчы тыыран үлэ күөстүү оргуйар.

Боотулуу нэһилиэгэр быйыл олорор сири-уоту тупсарыыга таһаарыылаах сыл тосхойдо – 25 мөлүйүөннээх үлэ саҕаланна. Ол курдук, олорор дьиэ-уот уонна коммунальнай хаһаайыстыба министиэристибэтиттэн 4,5 мөлүйүөн үбү ылан, нэһилиэк килбэйэр киинигэр турар сынньалан паарката 400 миэтэрэ эргимтэлээх саҥа тимир олбуорунан, ону тэҥэ 120 миэстэлээх олорор трибунанан хааччыллыаҕа. 6 киһилээх биригээдэ сир тоҥуон иннинэ үлэни бүтэрэр сыаллаах.

Кэлиҥҥи сылларга чугас эргин үгүстэ баһаар, уот курааннар тураннар элбэх күөл уолбута. Ол түмүгэр киһи иһэр да, сүөһү уулуур да уутун чугас сиртэн булар уустук буолан турар. Маныаха, нэһилиэк бэйэтин үбүттэн 2 мөлүйүөнү көрүнэн 80 миэтэрэ дириҥ сири дьөлө үүттээн сир аннынааҕы ууну таһаардылар. Уу дириҥэ 40 миэтэрэҕэ тиийэр, бу уу биир улахан куораты хааччыйыан сөп.

Ууну таһааран баран аны нэһилиэккэ тарҕатар наада. Манна, быйыл тыа хаһаайыстыбатын министиэристибэтэ 20-мөлүйүөннээх үбү көрөн, сайыҥҥы уу ситимин тардарга 9,5 килэмиэтир турбалары аҕаллылар.

Ханнык баҕар үлэни саҕалаатахха салҕанан барар. Бииртэн биир программаҕа киирсэн, үлэ бэйэ-бэйэтин ситимнэһэн эһиил сайын Боотулуу нэһилиэгэр уу кыһалҕата быһаарыллар дьылҕалаах.



Добавить комментарий

Ваш e-mail не будет опубликован. Обязательные поля помечены *

19 − 12 =