Үөһээ Бүлүүгэ кыһыннары-сайыннары үлэлиир теплица бастакы үүнүүтүн хомуйдулар

Комментарии Главные новости, Экономика и сельское хозяйство

Поделиться:

НВК САХА – Үөһээ Бүлүү улууһугар кыһыннары-сайыннары нэһилиэнньэҕэ анаан оҕуруот аһын үүннэрэр соҕотох хаһаайыстыба үлэтин саҕалаан, бастакы үүнүүнү хомуйдулар.

Урбаанньыт Роман Корякин Бүлүү бөлөх улуустарыгар бастакынан төгүрүк сыл устата оҕуруот аһын үүннэрэр хаһаайыстыба арынарга 10-ча сыллааҕыта толкуйдаабыт. Кэнники икки сылга сир куортамнаан, олоххо киллэрэн саҕалаабыт.

“10-ча гааҕа хортуоппуй, 1000 кв миэтэрэҕэ оҕурсу, 3-4 гааҕа арбуз, клубника олордубуппут. Клубникабытын анаан-минээн Италияттан сакаастаан ылбыппыт”, – диэн Роман кэпсиир.

Бастакы кыһыҥҥы 6*50-наах 300 кв миэтэрэ иэннээх теплица тутуута түмүктэнэн эрэр, былааҥҥа өссө икки теплица үлэҕэ киирэрэ күүтүллэр.

“Матырыйаалбыт барыта кэлэн, билигин үлэбитин ситэрэ сылдьабыт. Муостабыт ититиитэ хаалла. Үлэһиттэргэ анаан үргүлдьү дьиэ туттубут. Биһиэхэ сөп түбэһэр диэн буруус маһынан оҥордубут”, – диэтэ урбаанньыт.

Уопсайа 14 үлэһиттээх, ол иһигэр икки идэтийбит агрономнаах, экология өттүнэн барыта ыраас бэйэ оҕуруот аһын үүннэрэр хаһаайыстыба бу күннэргэ бастакы үүнүүнү хомуйан, үлэ үгэнигэр сылдьаллар.

“Суортарбыт барыта хайаан да ас биэриэхтээхтэр. Манна биир даҕаны химическэй эттиги туттубаппыт. Биһиэхэ үлэ миэстэтэ бөҕө тахсар, чугастыы оҕо лааҕыра аһыллан үлэлиирэ буоллар диэн баҕа санаалаахпыт. Бу курдук инникилээх үлэ саҕаламмытыттан олус үөрэбит”, – дэһэллэр үлэһиттэр.

Бастакы хомуур сарсыҥҥыттан нэһилиэнньэҕэ анаан атыыга тахсыаҕа.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

три × три =

ЛЕНТА НОВОСТЕЙ