Үөһээ Дьааҥы Адыаччытыгар тыын боппуруоһунан оскуола, уһуйаан тутуута буолар

Комментарии Главные новости, Общество и политика

Поделиться:

НВК САХА – Олунньу 20 күнүгэр Үөһээ Дьааҥы Адыаччы нэһилиэгэр СӨ бырабыыталыстыбатын отчуота буолан ааста. Үлэлиир бөлөҕү бырабыыталыстыба бэрэссэдээтэлин солбуйааччыта Денис Белозеров салайар. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.

Нэһилиэккэ сытыы боппуруоһунан оскуола тутуута буолар. 126 үөрэнээччи 1934 сыллаахха тутуллубут эргэ мас дьиэҕэ үөрэнэр, оскуола муостата эмэҕирэн бүппүт. Оттон оҕо уһуйаана икки куорпуһунан үлэлиир, 1964 сыллаахха тутуллубут дьиэтэ туруга мөлтөх.

Дениз Белозеров иһитиннэрбитинэн, Үөһээ Дьааҥы салалтатыгар СӨ тутуу министиэристибэтэ 120/75 миэстэлээх оскуола-оҕо уһуйаанын бырайыагын биэрбит. Онно туспа турар хочуолунай тутуута ирдэнэр, хочуолунайга Адыча киин ититиигэ холбоно илик чааһынай дьиэлэрин холбуохха сөп буолуоҕа.

Маныаха улуус салалтата өрөспүүбүлүкэ инвестиция бырагырааматыгар киллэрэргэ сайаапка түһэриэхтээх.

Ону таһынан Адыча нэһилиэгэр киирсэр Алыһардаах нэһилиэгин кулууба сабыллар куттааллаах. Нэһилиэк баһылыга Иннокентий Юмшанов эппитинэн, 100 киһиттэн аҕыйах нэһилиэнньээх пууннарга кулууптар сабыллыахтаахтар. Алыһардаахха бүгүҥҥү туругунан 102 киһи олорор, ол эрээри 94-дэ статистикаҕа киирбит. Олохтоохтор кулуубу саппаттарыгар көрдөһөллөр, тоҕо диэтэххэ, нэһилиэк инникитин сайдар тосхоллоох.

Адыаччы нэһилиэгэр барыта 954 киһи олорор. Нэһилиэк 1002 сыспай сиэллээх, 250 хороҕор муостаах. Хаһаайыстыба 60% чуолаан Алыһардаахха баар. Тыа сирин кулуубугар биэс киһи үлэлиир.

Өссө биир сүрүн боппуруоһунан экология буолар. Олохтоохтор Сартан уонна Адыча өрүстэргэ үлэлиир артеллары бэрэбиэркэлииллэригэр этии көтөхтүлэр.

Маны таһынан Адыча олохтоохторо кытаанах хомунаалынай тобохтору харайыы, сайыҥҥы уу турбатын, сибээс, уунан таһаҕаһы таһыы туһунан о.д.а. боппуруостары таарыйдылар.

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

16 − 13 =

ЛЕНТА НОВОСТЕЙ