Егор Борисов саха араадьыйатыгар аһаҕас кэпсэтиигэ кытынна

Комментарии Главные новости, Общество и политика

Поделиться:

НВК САХА – Ил Дархан Егор Борисов саха араадьыйатыгар аһаҕас эфиргэ таҕыста. Кини республика сайдыытын сүрүн хайысхаларын, сөбүлүүр дьарыгын туһунан кэпсээтэ, ону таһынан истээччилэр ыйытыыларыгар хоруйдаата:

– Нэһилиэнньэ 54% киин улуустарга, улахан нэһилиэктэргэ олорор буолла. Билигин баар үлэлэргэ сөп түбэһэр идэ аҕыйаан иһэр, онон ыччат кэм сайдыытыгар сөп түбэһиннэрэн үөрэҕин талыахтаах. Үлэлээх буолуу политикатын сөпкө аттаран, үлэбитин салгыы ыытыахтаахпыт.

– Саха сиригэр 2018 сыл нэһилиэнньэ дьарыктаах буолуутун көҕүлүүр сылынан биллэриллибитэ. Промышленноска, тутууга, атын да эйгэҕэ олохтоох дьон 17,5% үлэлиир. Билиҥҥи кэмҥэ “Олохтоох кадрдары – промышленноска” бырагыраама иитинэн икки тыһыынчаттан тахса бэйэбит ыччаппыт үлэлии-хамсыы сылдьар. Мин санаабар, бу хайысхаҕа элбэх үлэ ыытыллан, 2018 сыл үчүгэй түмүктэрдээх буолуоҕа.

– Республикаҕа дьиэ тутуутугар хас да хайысханан үлэни ыытабыт. Ол курдук, “Хаарбах дьиэттэн дьону көһөрүү” бырагыраама үлэтэ ааспыт сылга үрдүк көрдөрүүлээх. Чааһынай дьиэни тутуу 5-6 сыл иһигэр икки төгүл улаатта, квадратнай миэтэрэни 600 тыһыынчаҕа тиэртибит. Уһук Илиҥҥи уокурукка Саха сирэ бастакы миэстэҕэ сылдьар. Республикаҕа чааһынай дьиэ 60 % кииннэммит ититиигэ холбонорун ситистибит. Ону таһынан, тыа сиригэр социальнай эбийиэктэри тутуу, чааһынай дьиэлэри толору хааччыйан, тупсаран биэрии үлэтэ салҕанар.

– Республика бырабыыталыстыбатын отчуота үтүө үгэскэ кубулуйда. Дьон-сэргэ отчуоту биһириир, кэтэһэр. Былааһы кытта атах тэпсэн олорон сөптөөх боппуруоһу туруорарга үөрэннэ. Бу үлэ бырабыыталыстыба чилиэттэрин эппиэтинэһин үрдэтэргэ эмиэ оруоллаах. Инникитин да тустаах үлэ салҕанан барыа.

– Саха дьоно былыр-былыргыттан аҕа көлүөнэҕэ уратытык, убаастабыллаахтык сыһыаннаһар. Аҕам саастаах дьон доруобуйатыгар болҕомто уурарбыт түмүгэр, республикаҕа гериатрия киинэ тэрилиннэ. 75 саастарыттан ааспыт кырдьаҕастарга патронат олохтоон, анал эмчиттэр сыстан кэтиир-маныыр, эмтиир буоллулар.

– Тыа хаһаайыстыбатын үлэһиттэрин хамнастара үрдүүрүн туһугар, бэйэ бородууксуйатын хаачыстыбата тупсуохтаах. Манна үтүө холобурунан “Бөртө”, “Кэриэстээх”, “Тумул” хаһаайыстыбалары бэлиэтээн көрдүм. Инникитин да маннык кооперативтар сайдар кыахтаахтар.

– Ынах-сылгы иитиитэ төһө да ночооттооҕун иһин, аныгы технологиялары таба туһаннахпытына, төрүт дьарыкпыт хаһан да сүтүө, симэлийиэ суоҕа. Уһук Илиҥҥи уокурук сүөһүтүн ахсаанын улахан аҥаара биһиэхэ баар.

– Буолаары турар дойду президенин быыбарыгар хас биирдии киһи кэлэр кэскилин өйөөн, эппиэтинэстээхтик сыһыаннаһан кыттыахтаах.

Чыпчылҕан ыйытык:

Дьыл кэмэ: сайын

Сөбүлүүр бүлүүдэтэ: саламаат

Киинэ көрүүтэ дуу, кинигэ ааҕыыта дуу: киинэ

Киинэ жанра: боевик

Сөбүлүүр артыыһа: Стивен Сигал

Дьахтар күнүгэр кэргэнигэр бэлэҕэ: сибэкки уонна платок

Сөбүлээн күүлэйдиир сирэ: Дьокуускай сынньалаҥ паарката

Туристары ханна илдьиэ этэй: Өлүөнэ очуостара

Инстаграм ситимэ: сонуннарын бэйэтэ суруйар, хаартыскаҕа түһэрэр

Дьоҥҥо сөбүлүүр хаачыстыбата: чиэһинэй уонна эппиэтинэстээх буолуу



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

семь − 3 =

ЛЕНТА НОВОСТЕЙ