Галина Данчикова: Саха сирэ 53 миллиард солкуобайы ылыаҕа

Комментарии Главные новости, Экономика и сельское хозяйство

Поделиться:

НВК САХА – Бэрэсидьиэн Владимир Путин Федеральнай мунньахха туһаайан этиитигэр бэлиэтээбит национальнай бырайыактары олоххо киллэрэргэ Саха сирэ 53 миллиард солкуобайтан тахсаны ылыаҕа. Бу туһунан Судаарыстыбаннай Дума дьокутаата Галина Данчикова иһитиннэрдэ. Кини туһаайан этии тэрээһинигэр үһүс төгүлүн кытынна.

Парламент чилиэннэрэ этэллэринэн, быйылгы туһаайан этии уруккулартан ураты буолла. Бастатан туран, бу сырыыга сүрүн болҕомто национальнай бырайыактарга буолла. 2019 сылтан 2024 сылга диэри тустаах сыалга 25 триллион солкуобай ыытыллыаҕа.

“Демографияҕа, социальнай өйөбүлгэ, дьиэ кэргэни өйүүргэ, экэниэмикэҕэ, экологияҕа, инфраструктура, инновация, научнай-техническэй сайдыыга маннык харчы көрүллэ илигэ”, – диэн Галина Данчикова бэлиэтээн эттэ.

Саха сирэ федеральнай бүддьүөттэн национальнай бырайыактары олоххо киллэрэргэ үс сыл иһигэр 53 миллиард солкуобайтан тахсаны ылыаҕа.

Оҕолордоох ыалларга судаарыстыба көмөтө балтараа төгүл улаатыа.

“Саха сиригэр куруук оҕо төрөөһүнэ элбэх этэ, онон маннык өйөбүл демография үрдүүрүгэр көҕүлүө”, – диэтэ Данчикова.

2019 сыл от ыйын 1 күнүттэн инбэлиит оҕолоох ыалларга босуобуйаны үрдэтэр туһунан Путин этии киллэрбит. Онуоха Галина Данчикова этэринэн, Саха сиригэр бу көмөҕө олус үөрүөхтэрэ. Дьокутааттан ыарыһах оҕолоох ыаллар оҕо эмтэнэригэр элбэх харчы наада буоллаҕына, көмө көрдөһө кэлэллэрэ элбэх.

“Маны таһынан дьиэ туттарга усулуобуйаны тэрийии эмиэ улахан суолталаах. Оччоҕо тыа сиригэр олох тупсуо, куораттааҕар итэҕэһэ суох олоруо этилэр. Маныаха саҥа бырагыраама үлэлиэ. Бэрэсидьиэн чуолкай эппитинэн, бырагыраама 2020 сыл тохсунньу 1 күнүттэн саҕаланыа”, – диэн Данчикова эттэ.

“Земскэй доктор” туһунан эттэххэ, манна дьон сааһынан тутулуга суох бырагыраамаҕа киирдэҕинэ, улуус кииннэрин эрэ буолбакка, кыра нэһилиэнньэлээх пууннары быраастарынан хааччыйыа этилэр. “Земскэй доктор” бырагыраамаҕа быраас кыра куораттарга эбэтэр тыа сиригэр үлэлии бардаҕына, 1 мөлүйүөн солкуобайы ылар.

“Саха сиригэр “Земскэй доктор” бырагыраама 2012 сылтан үлэлиир. Онуоха федеральнай бүддьүөттэн 60% уонна өрөспүүбүлүкэттэн 40% үбүлэнэр. Бу сыллар тухары Саха сирин 728 бырааһа маннык төлөбүрүнэн туһанна. Былырыыҥҥыттан “Земскэй биэлсэр” бырагыраама үлэлээбитэ. Онно 25 исписсэлиис 500 тыһыынча солкуобайы ылбыта”, – диэн Данчикова эттэ.

Дьокутаат “Земскэй учуутал” бырагырааматын үөрэ истибит. Владимир Путин 2020 сылтан бырагырааманы үлэлэтэр туһунан этии киллэрбит. Ол курдук тыа сиригэр уонна кыра куораттарга үлэлии барбыт учууталлар 1 мөлүйүөн солкуобайы ылыахтаахтар.

 

Национальнай бырайыак иитинэн өрөспүүбүлүкэҕэ экология тупсуохтаах, тырааныспарынан сырыы элбиэхтээх, аэропортар саҥардыллыахтаахтар, туризм сайдыахтаах.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

шестнадцать + шесть =

ЛЕНТА НОВОСТЕЙ