Халаан уутугар эмсэҕэлээбит дьон тугу туруорсуохтарын сөбүй?

Комментарии Общество и политика

Поделиться:

НВК САХА – Сыл ахсын өрөспүүбүлүкэ олохтоохторо халаан уута курдук айылҕа көстүүтүттэн эмсэҕэлииллэр. 2018 сыллааҕы халаан уута 1,4 миллиард солкуобай суумалаах хоромньуну таһаарбыта. 5 тыһыынча киһи олорор 1,5 тыһыынча дьиэтэ ууга барбыта. Маныаха олохтоохтору халаан уутугар былдьаммыт мал-сал хоромньутун хайдах гынан төлөттөрөр туһунан боппуруос ордук долгутар диэн СӨ борокуратууратын пресс-сулууспата иһитиннэрэр.

Ол курдук, «Ыксаллаах балаһыанньа» федеральнай конституционнай сокуон 29-с ыстатыйатын 2-с чааһыгар олоҕуран, ыксаллаах балаһыанньа кэмигэр эмсэҕэлээбиттэргэ маннык көмө көрүллэр: олорор дьиэ бэриллэр, оҥоһуллубут хоромньу төлөнөр, үлэ көрдөнөргө көмө оҥоһуллар уонна РФ бырабыыталыстыбатынан көрүллэр наадалаах көмө көрүллэр.

Ону таһынан, «Нэһилиэнньэни уонна территориялары айылҕа содулуттан уонна техногеннай биричиинэнэн тахсыбыт ыксаллаах балаһыанньаттан көмүскүүр туһунан» федеральнай сокуон 18-с ыстатыйатын 1 чааһыгар ыйыллыбытынан, Арассыыйа олохтоохторо доруобуйаҕа биитэр олоххо ылбыт хоромньуларын толугун ирдэһэр бырааптаахтар.

Халаан уута кэлэрин уонна дьиэ ууга барыан сөптөөҕүн болҕомтоҕо ууран, дьиэ бас билээччилэрэ үбү-малы, дьиэтээҕи кыыллары, тус докумуоннары уонна да атын докумуоннары харыстыырга миэрэлэри ылыныахтаахтар. Ол эбэтэр, ууга барбат сиргэ көһөрөн харайар сөптөөх.

Ууга барбат атын ыаллар дьиэлэригэр көһөн барар түгэҥҥитигэр, муниципальнай тэриллии дьаһалтатыгар биллэрэргит булгуччулаах.

Ыксаллаах быһыыттан эмсэҕэлээбиттэргэ биирдэ оҥоһуллар материальнай уонна үбүнэн көмө ыларга булгуччулаах усулуобуйанан буолаллар:

— Арассыыйа Федерациятын гражданствота баар буолуохтаах;

— эмсэҕэлээбит дьон хоромньу ылбыт дьиэҕэ чахчы куруутун олороллорун туһунан туоһулуур сибидиэнньэ;

— дьон мала-сала толору биитэр сороҕо алдьаммытын чахчыта.

СӨ бырабыыталыстыбатын 2017 сыл атырдьах ыйын 30 күнүнээҕи уурааҕынан олохтоммут ыксаллаах быһыыны уонна айылҕа быһылаанын сэрэтэргэ уонна суох оҥорорго бырабыыталыстыба саппаас пуондатын бүддьүөттээх үбүлээһинин бэрээдэгин 1.4 пуунугар олоҕуран, үп-харчы маннык бэрээдэгинэн көрүллэр:

— биирдэ оҥоһуллар материальнай көмө кээмэйэ биир киһиэхэ 5 тыһыынча солкуобай буолар;

—  сүрүн наадалаах малын сүтэрбит дьоҥҥо үбүнэн көмө (сороҕо алдьаммыт малга — 10 тыһыынча солкуобай 1 киһиэхэ, толору алдьаммыт малга – 20 тыһыынча солкуобай 1 киһиэхэ);

— көмө харчы төлөбүрэ:

— ыксаллаах быһыы түмүгэр доруобуйаларыгар хоромньу ылбыт дьоҥҥо, төһө улаханыттан учуоттаан (ыар биитэр орто ыар хоромньуга – 1 киһиэхэ 100 тыһыынча солкуобай, чэпчэки хоромньуга – 50 тыһыынча солкуобай);

— ыксаллаах быһыы түмүгэр өлбүт дьон дьиэ кэргэнигэр (500 тыһыынча солкуобай хас биирдии дьиэ кэргэн чилиэнигэр).

Муниципальнай оройуон дьаһалтата көмө харчы ылар бырааптаах дьон испииһэгин оҥорор. Холобур, ким эмит олорор сиригэр регистрацията суох буолан, испииһэккэ киирбэтэх түгэнигэр, бэйэтэ суут нөҥүө быраабын көмүскүүр бырааптаах.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

16 + 16 =

ЛЕНТА НОВОСТЕЙ