Халыма өрүс умнаһынан сытар улуустарга кыһыҥҥы суол арылла илик буолан, уустуктар үөскээтилэр (ВИДЕО)

Комментарии Общество и политика

Просмотров: 26

NVK-ONLINE.RU – Орто Халыма улууһугар Кэтэх күөлгэ муус халыҥа баара-суоҕа муҥутаан 50 сантиметрга тэҥнэһэр. Сорох өттүнэн муус 20-тэн 40 эрэ диэри халыҥнаах.

Күн бүгүн Халыма суола тэрилтэ Хатыннаах нэһилиэгин диэки хайыһан үлэлиир. Ол хайысхаҕа икки өттүттэн үлэ барар. Суол үлэһиттэрэ уонна нэһилиэк олохтоохторун күүстэринэн ДТ тыраахтарынан оҥорон иһэллэр. Ол кэннэ Арҕахтаах, Андрюшкино хайысханан суолу оҥоруохтаахтар.

Хоту улуустарга суолу оҥорооччулартан таһаҕаһы тиэрдии улахан тутулуктаах. Бу күҥҥэ вездехоттар сылдьар да буоллахтарына, тиэйиллэр таһаҕас бэрт кыра. Онон бу күннэргэ тыа сиригэр уонна сырыыта суох Арктика улуустарыгар аһы-үөлу, уматыгы тиэрдии туһунан анал этии Бырабыыталыстыбаҕа киириэхтээх.

Аллараа Халымаҕа балаһыанньа өссө тохсунньу 7 күнүгэр сытыырхайбыта. 8 чыыһылаҕа уматык саппааһа 11 тыһыынча 700 тоннаҕа тэҥнэспитэ. Бу күннэргэ вездехзодунан, буранынан уматыгы тиэйтэрэн, билигин кыра да буоллар саппаастаахтар.

Бу күннэргэ Усуйаана улууһугар буурҕалаах, тибиилээх күннэр тураллар. Манна эмиэ суол өтөрүнэн аһыллыа суох курдук. Буурҕа түһэн, түптээх үлэ ыытыллыбакка турар.

Онтон халлаан туруга хоту улуустарга ый бүтүөр диэри 23-27 кыраадыс туруоҕа, тыал күүһэ сөкүүндэҕэ 10-15 миэтирэҕэ тиийэ түргэннээх.

Хоту улуустар балаһыанньалара Бырабыыталыстыба кыраҕы кэтэбилигэр. Оройуоннартан иһитиннэрии күннэтэ киирэр, бу күҥҥэ ыраах сытар нэһилиэнньэлээх пууннарга уматык, оттук, ас саппааһа суол туруор диэри баара биллэр.



Добавить комментарий

Ваш e-mail не будет опубликован. Обязательные поля помечены *

1 × три =