Хатыҥ уутун ыларга билигин ордук табыгастаах кэм

Комментарии От редакции

Поделиться:

НВК САХА – Ыам ыйын 20 күнүттэн саҕалаан биир нэдиэлэ устата хатыҥ уутун ылар кэм үүнэр. Бу манан дьарыктанар, ону таһынан эмтээх үүнээйини хомуйар Варвара Львова хатыҥ уутун сиэри-туому тутуһан сүүрдүү уонна хатыҥ мас лабаата, сэбирдэҕэ киһи доруобуйатыгар туһалааҕын туһунан кэпсээтэ.

Айылҕа маанылаах маһын алдьатыах иннинэ сиэри-туому тутуһан, Күөх далай, хара тыа иччититтэн көрдөһөн баран биирдэ ылар көҥүллэнэр.  Ол курдук бастаан бытыылканы хатыҥҥа баайан баран, утах иһэр туруупканы туһаайан, күн көрөр сирин өттүнэн хатыҥы сэрэнэн тэһэллэр. Хатыҥ уута сүүрбүтүн кэннэ туруупканы түспэт гына баайыллар.

“Хатыҥ уутун сааһыттан тутулуга суох, кыратыттан-улаханыгар тиийэ иһиэхтэрин сөп. Туһалаах битэмиин барыта баар уонна киһини уоскутар, киһи этигэр-сиинигэр баар куһаҕан эттиктэри сайҕаан таһаарар күүстээх. Ордук быарга, ноорго, куртахха уонна, уопсайынан, киһи ис уорганыгар олус туһалаах. Күҥҥэ үстэ биирдии ыстакааны истэххэ, доруобуйа тупсар, көнөр, чуолаан улахан тумуу, тымныйыы кэнниттэн туһаннахха, киһи этэ-сиинэ чөлүгэр түһэр”, – диэн Варвара Львова кэпсээнин салҕыыр.

Дьон олорор сириттэн ыраах үүнэр уонна эдэр хатыҥтан ууну ылар табыгастаах, тоҕо диэтэххэ, эдэр хатыҥ сиртэн ылар күүһэ, битэмиинэ быдан элбэх.

Хатыҥ ытарҕата эмиэ киһи доруобуйатыгар туһалааҕынан биллэр, ол курдук хатаран, үлтүрүтэн баран, итии ууга кутан, биир ыстакааны күҥҥэ үстэ нэдиэлэ устата истэххэ, төбө тымырын кэҥэтэр, кырдьыыны бытаардар иҥэмтэлээх.

“Хатыҥ уутун амтана саахардаах ууга майгынныыр. Кыһын устата морозильникка уга сылдьан, ыстакаан үс гыммыт биирин иһиэххэ сөп. Хатыҥ уутун таһынан, сэбирдэҕэ эмиэ битэмииннээх, балык тылын саҕа буоллаҕына хомуйан баран, күн уота көрбөт, хараҥа сиргэ тэлгэтэн куурдуллар. Дьэ, бу кэннэ сылаас ууга биир кыра ньуоска сэбирдэҕи кутан, үс чаас туруоран баран, күҥҥэ үстэ, биир нэдиэлэ устата иһиллэр. Бу хабахха, бүөргэ ордук туһалаах”, – диэн Варвара кэпсээнин түмүктүүр.

Онон киһи доруобуйатыгар бары өттүнэн туһалаах хатыҥ уутун ылар кэм үүммүтүнэн, айылҕалыын алтыһа, кэҕэ кыыл этэр саҥатын истэ, сайын кэлбитин уруйдуу ойуурга тахсыҥ.  –яв//кс

 

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

шестнадцать − 9 =

ЛЕНТА НОВОСТЕЙ