Ил Дархан Мэҥэ Хаҥаласка от үлэтин хаамыытын билистэ

Комментарии Общество и политика

Поделиться:

НВК САХА – От ыйын 22 күнүгэр Ил Дархан Айсен Николаев Мэҥэ Хаҥаласка үлэлээтэ. Төҥүлү нэһилиэгэр илин эҥээр улуустарын баһылыктара, тыа хаһаайыстыбатын үлэһиттэрэ кыттыылаах оттооһун боппуруоһунан киэҥ ыҥырыылаах мунньаҕы салайда. Илин эҥээр улуустарын баһылыктара, тэрээһиннээх хаһаайыстыбалар салайааччылара билиҥҥи балаһыанньаны билиһиннэрдилэр.

Айсен Николаев оробуочай сырыыта Догдоҥо сиригэр-уотугар Анабы алааска отчуттары кытта көрсүһүүттэн саҕаланна. 65 гаалаах Анабы ходуһатыгар ааспыт сылтан эдэр фермер Роман Морозов оттуур. Ходуһаны былырыын күрүөлээбиттэр, ол эрэн ходуһа быйыл курааннаан, онно эбии аһыҥа туран, от үүнүүтэ мөлтөҕүн отчуттар бэлиэтииллэр.

“Дьоммут от ыйын 14 күнүттэн окко киирбиттэрэ. Илин өттүгэр оттоон, урут 20-лии тонна кэлэр буоллаҕына, билигин биир-икки тонна оту ыллылар”, – диэтэ Догдоҥо нэһилиэгин баһылыга Иван Новгородов. 

Салгыы оробуочай бөлөх Хорообут бөһүөлэгэр баар үһүс нүөлсүтэр систиэмэни көрдө. Бу Иван Тимофеев аатын сүгэр нүөлсүтэр систиэмэ Сэбиэскэй кэм саҕанааҕы тутуу буолан, эргэрэн, өрөмүөн үлэтигэр наадыйарын туһунан хорообуттар санааларын этиннилэр.

“Эһиил булгуччу бырайыактыыр-симиэтэлиир докумуон баарынан туһанан, бүддьүөккэ киллэрэн ити эбийиэги хайаан даҕаны тутуохпутун наада. Оччоҕуна Мэҥэ Хаҥаласка Хорообут систиэмэтэ өссө элбэх туһаны таһаарар кыахтаах”, – Айсен Николаев бэлиэтээтэ.

Күн иккис аҥаарыгар оробуочай бөлөх Төҥүлүгэ мунньахха кытынна. Улуустарга оттооһун хаамыытын балаһыанньата эриэ-дэхси. Мунньах түмүгүнэн, Ил Дархан Айсен Николаев тыа хаһаайыстыбатын министиэристибэтигэр курааннаабыт өттүлэригэр мобильнай биригээдэлэри ыытарга, билигин ааҕынан-суоттанан, оту атыылыырга сыананы быһарга сорудахтаата.Улуустар бэйэ ыккардыларыгар дуогабардары түһэрсэллэригэр сүбэлээтэ.

Сүөһү эбии аһылыгар кэлэр сыллааҕы бырагыраамаларга этиилэри хомуйарга, мелиорация уонна сир боппуруостарын сөпкө кэмигэр туруоралларын ыйда. Кэлэр сылларга тыа хаһаайыстыбатын сайдыытыгар сир боппуруоһун механизмнарын Ил Түмэн депутаттара үөрэтэн көрөллөрүгэр эттэ.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

четырнадцать + 15 =

ЛЕНТА НОВОСТЕЙ