Ил Дархан өрөспүүбүлүкэ сааскы халааҥҥа бэлэмин билистэ

Комментарии Главные новости

Поделиться:

НВК САХА – Ил Дархан Айсен Николаев муус устар 15 күнүгэр өрөспүүбүлүкэ сааскы халааҥҥа бэлэмин туһунан ыксаллаах быһыыны-майгыны сэрэтэр уонна туоратар хамыыһыйа мунньаҕын ыытта. Бу туһунан бырабыыталыстыба пресс-сулууспата иһитиннэрэр.

Дьокуускайдааҕы гидрометеорология управлениетын начаалынньыга Людмила Мурашко иһитиннэрбитинэн, быйыл өрөспүүбүлүкэ өрүстэрэ 2-5 суукканан эрдэлээн эстиэхтэрэ.

«Ленскэй уонна Өлүөхүмэ улуустарыгар Өлүөнэ өрүс ыам ыйын 5-11 күннэригэр арыллыаҕа, Өлүөхүмэ куорат аннынан муус ыам ыйын 11-13 күннэригэр, Покровскай-Дьокуускай-Кангаласс аннынан ыам ыйын 14-19 күннэригэр, онтон Сангаар бөһүөлэгин  аннынан ыам ыйын 19-21 күннэригэр устуо диэн сылыктыыбыт. Өрүс аллараа тардыытынан муус ыам ыйын бүтүүтэ, оттон Күһүүр аннынан бэс ыйын биэс бастакы күнүгэр барыаҕа», — диэн Людмила Мурашко иһитиннэрдэ.

Ыам ыйын бастакы декадатыгар 5-6 суукканан эрдэлээн Амма өрүс устуоҕа, иккис декадаҕа – Алдан уонна Бүлүү. Хотугу өрүстэр – Дьааҥы, Индигиир уонна Халыма ыам ыйын үһүс декадатыгар устуохтара диэн сабаҕалыыллар.

Өрөспүүбүлүкэҕэ нэһилиэнньэҕэ куттал суоһаабатын хааччыйар кэмитиэт бэрэссэдэтэлэ Дмитрий Лепчиков иһитиннэрбитинэн, өрөспүүбүлүкэ нэһилиэнньэлээх пууннарыгар гидротехническай тутуулары бөҕөргөтүү, суоллар, күргэлэр, энергетика уонна ДьУОХХ эбийиэктэрэ ууга барбаттарын курдук дьаһаллар ыытыллаллар. 14 улууска мууһу хараардыы, эрбээһин үлэтэ түмүктэнэр.

Уу ылар кутталлаах нэһилиэктэр олохтоохторун сэрэтиигэ үчүгэй, быстыбат сибээһинэн хааччыйыы үлэтэ барар.

Маны таһынан, мунньах кэмигэр Үөһээ Халыма, Ленскэй, Уус Майа уонна Дьокуускай баһылыктара халааҥҥа бэлэмнэниигэ туох үлэни ыыппыттарын отчуоттаатылар.

Айсен Николаев өрөспүүбүлүкэ үрдүнэн халааҥҥа бэлэмнэнии үлэтэ былааннаммытын курдук баран иһэрин бэлиэтээтэ. Муус ааһар кэмигэр нэһилиэнньэни хаачыстыбалаах иһэр уунан, эминэн-томунан, аһынан-үөлүнэн хааччыйыы, сылгыны-сүөһүнү кэмигэр уу ылбат сирдэригэр көһөрүү, гидротехническай тутуулар тохтоло суохтук үлэлииллэрин хааччыйыы, силовой структуралар уонна ЫБММ күүстээх дьуһуурустубаны ыыталлара биир бастакынан хааччыллыахтааҕын туһунан Ил Дархан сорудахтаата.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

девятнадцать + 19 =

ЛЕНТА НОВОСТЕЙ