Үйэ аҥаарыттан ордук кэм иллээхтик олорбут 95 ыал Ил Дархан эҕэрдэтин тутта

Комментарии Главные новости, Общество и политика

Поделиться:

НВК САХА – Ыам ыйын 15 күнүгэр норуоттар икки ардыларынааҕы Дьиэ кэргэн күнэ бэлиэтэннэ. Быйыл өрөспүүбүлүкэҕэ үйэ аҥаарыттан ордук кэм иллээхтик олорбут 95 ыал Ил Дархан Айсен Николаев эҕэрдэ суругун тутта. Кинилэртэн биирдэстэрэ – Евдокия, Егор Семеновтар.

Семеновтар олохторун суолун холбообуттара үйэ аҥаара буолла. Оттон ол 1969 сыллааҕы Ньурба сандаарар сааскы дьикти күнэ субу бэҕэһээ курдук этэ дии!

“Ньургуһун үүнэн турарын үргээн биэрээри гыммыта. Ону мин бу курдук эппитим: “Суох, үргээмэ. Үргээтэххинэ, таах өлөн хаалыа. Ол кэриэтэ мин ньургуһунтан көрдөһүөм. Биһиги 50 сыл бииргэ олоруохтаахпыт, ону кини биһигини алгыахтаах”, – диэн Евдокия субу баардыы кэпсиир.

Онон дьоллорун түстээбит, ньургуһун сибэккигэ сүгүрүйэн, таптаһар сүрэхтэр улахан кыыстарын Ньургустаана диэн сүрэхтээбитттэр. Ол кэмтэн олохторун оскуоланы кытта ситимнээн, Евдокия – иитээччи, Дьөгүөр үлэ учуутала, булчут бэрдэ этэ. Барыга-бары көх-нэм буолар тускулун билигин да ыал ийэтэ ыһыктыбакка, ииһин туппутунан сылдьар.

Дьиҥ иһигэр Семеновтары дьылҕа хаан үтэн-анньан көрбүт ыала. Эдэрдэригэр икки кырачааннарын сүтэрбиттэрэ, сэттэ сылтан бэттэх Дьөгүөр улаханнык ыалдьар. Маныаха оҕо сылаас сыһыана күүс эбэр, санааны бөҕөхсүтэр.

“Сиэннэрим ийэлээхпиттэн соһуйаллар. “Эһиги курдук мин эмиэ ийэлээхпин, аҕалаахпын, онон эһиги эмиэ төрөппүттэргитигэр күүс-көмө буоларга холобур оҥостуҥ”, – диэн куруук үөрэтэбин”, – диэтэ Семеновтар улахан кыыстара Ньургустаана.

Ыал дьоло – ыччаттара, ыраас таптал, хардарыта ытыктабыл, өйөһүү-өйдөһүү. Семеновтар курдук 50 сылтан ордук кэм иллээхтик олорбут 95 ытык ыал быйыл Ил Дархан Айсен Николаев эҕэрдэтин тутта, ааттара-суоллара көмүс кинигэ алтыс туомугар киирдэ.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

девятнадцать + 13 =

ЛЕНТА НОВОСТЕЙ