Күп сэлиэнньэтин социальнай эбийиэктэрин өрөмүөнэ оттук дьыла саҕаланыар диэри түмүктэниэ

Комментарии Общество и политика

Поделиться:

НВК САХА – СӨ бырабыыталыстыбатын бэрэссэдээтэлин эбээһинэһин толорооччу Владимир Солодов сааскы халаан уутуттан эмсэҕэлээбит Уус Маайа оройуонун Күп сэлиэнньэтин олохтоохторун кытта көрүстэ. Көрсүһүү кэмигэр Владимир Солодов нэһилиэккэ халаан содулун туоратар үлэ үчүгэйдик тэриллибит диэн түмүккэ кэллэ. Маны сэргэ нэһилиэк социальнай эбийиэктэрин өрөмүөнэ оттук дьыла саҕаланыар диэри түмүктэниэ диэн иһитиннэрдилэр. Бу туһунан Ил Дархан уонна бырабыыталыстыба пресс-сулууспата иһитиннэрэр.

Көрсүһүү иннинэ бырабыыталыстыба делегацията алдьаммыт муостаны, быһыты, авиа былаһаакканы, маны таһынан тустуу саалатын, оскуола мастырыскыайын, үүт собуотун, орто оскуоланы уонна Д.Н. Апросимов аатынан литературнай музейы көрдө. Маны сэргэ халаантан эмсэҕэлээбит дьон дьиэлэригэр сырыттылар.

Нэһилиэккэ халаан содулун туоратар үлэ үчүгэйдик тэриллибит диэн түмүккэ кэллэ.

«Быйыл Күпкэ 20-чэкэ сыл кэлбэтэх улахан халаан уута кэлэн ааспытын кэпсээбиттэрэ. Билигин манна чөлүгэр түһэрэр үлэ “күөстүү оргуйарыттан” киһи үөрэр. Миэхэ оттук дьыла саҕаланыар диэри социальнай эбийиэктэр өрөмүөннэрэ түмүктэниэ диэн эттилэр», – диэн Солодов эттэ.

Маны таһынан халаантан эмсэҕэлээбит дьоҥҥо көмө быһыытынан төлөнөр үп  бырабыыталыстыба хонтуруолугар турар диэн тоһоҕолоон эттэ.

«Өрөспүүбүлүкэ бүддьүөтүттэн көрүллүбүт үп дьоҥҥо төлөммүтэ. Сотору кэминэн федеральнай бүддьүөттэн көрүллүөхтээх үп боппуруоһа быһаарыллыа. Халаан содулун туоһулуур докумуоннар, төһө эбийиэк, төһө дьон олорор дьиэтэ эмсэҕэлээбитин туһунан испииһэк бириэмэтигэр дойду ыксаллаах быһыыга-майгыга министиэристибэтигэр тиксэриллибитэ. Ил Дархан эбээһинэһин быстах кэмҥэ толорооччу Айсен Николаев дойду үп миниистирин Антон Силуановы уонна дойду ыксаллаах быһыыга-майгыга миниистирин Зиничевы кытта көрсөн турар. Көмө харчыны төлүүр туһунан дойду бырабыыталыстыбатын дьаһала дьаһалын бэлэмниир үлэ түмүктэнэн эрэр. От ыйын бүтүүтэ харчы түһүө диэн эрэнэбит», – диэн Владимир Солодов эттэ.

СӨ бырабыыталыстыбатын бэрэссэдээтэлин маҥнайгы солбуйааччы Алексей Колодезников олохтоохтор боппуруостарыгар хоруйдуур кэмигэр, чөлүгэр түһэрэр үлэҕэ наадалаах тутуу матырыйаала Дьокуускайтан Уус Маайаҕа номнуо айаннаан иһэрин туһунан бэлиэтээн эттэ. Холобура Элдьигээн олохтоохторо номнуо матырыйаалы тутаннар, дьиэлэрин чөлүгэр түһэрэ сылдьаллар.

«Маны таһынан «АЛРОСА» хампаанньа биир мөлүйүөн солкуобайы көрбүтэ, бу үбүнэн үс халаан уутугар эмсэҕэлээбит нэһилиэнньэлээх пууҥҥа тутуу матырыйаалын атыылаһыахпыт. Оһох кирпииччэтинэн хааччыйыыга кэккэ кыһалҕалар бааллар, өрөспүүбүлүкэ үрдүнэн 180 тыһыынча кэриҥэ кирпииччэ наада», – диэн бырабыыталыстыба бэрэссэдээтэлин маҥнайгы солбуйааччы Алексей Колодезников иһитиннэрдэ.

 

Источник: сайт телеканала «Якутия 24».



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

5 × четыре =

ЛЕНТА НОВОСТЕЙ