«Үлэһит ыт». Эдьигээн олохтооҕо ытын көлүнэн, дьиэ тас үлэтин кыайа тутар

Комментарии От редакции

Поделиться:

НВК САХА – Эдьигээн нэһилиэгин олохтооҕо Владимир Васильев ыты көлүнэрин биир дойдулаахтара сөҕө-махтайа көрөллөр. Кини элбэх оҕолоох табаһыт дьиэ кэргэнигэр төрөөбүт буолан, оҕо сааһа тыаҕа ааспыта.

Тыа дьонун сиэринэн дьоно ыттары иитэллэрэ, онон оҕолор дьиэ кыылын кытта доҕордоһо, оонньуу, көлүнэ да улааппыттара. Бу дьарыгын бырахпакка, Владимир Герасимович олоҕун тухары ыты иитэн, доҕор, көмө оҥостон илдьэ сылдьар.

Хаһаайын үс саастаах түөрт атахтаах доҕорун Кэрэмэһи аһылыкка ыҥырар. Ол кэннэ атастыылар кыра сыарҕаларын иилинэн, Владимир Герасимович ытын көлүнэн наадатыгар айанныыр. Кэрэмэс килэҥ суолга тахсан, эҥкилэ суох буур табалыы түргэн үлүгэрдик сүүрдэн, тиийиэхтээх сиригэр хаһаайынын тиэрдэр.

“Урут “Бурана” суох эрдэхпинэ, өрүскэ сатыы балыктыы киирээччибин. 7 килэмиэтирдээх сиргэ балыктыыр сир баар. Онно сатыы барабын-кэлэбин. Биир куул балыгы ыппар состорон аҕалар этим”, – диэтэ Владимир.

Маннык быһыы аныгы дьон көрөрүгэр ураты көстүү, ол иһин да дьон ыты көлүнүүнү муодаргыы көрөллөр.

Владимир Герасимович ыт оҕотун ылаат, борбуйун көтөхтө да, ханнык да дьыл кэмэ буоллун, таһырдьа тутар идэлээх. Ааннаах, тирии тэллэхтээх уйаҕа ытын дьиэлээн кыһыны кыстатар. Оччоҕо ыт тулуурдаах, дьиэни тэпсибэт буола улаатар. Өрүү киһи курдук кэпсэтэ-ипсэтэ сылдьар, сорудахтарын толотторо үөрэтэр.

Бу курдук Владимир Герасимович доҕорун кытта кыанар дьыалаларын бэйэлэрэ сылдьан ситиһэллэр, төрүт дьарыгы сөргүтэн, дьоҥҥо үтүө холобур буолаллар.



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

девять + одиннадцать =

ЛЕНТА НОВОСТЕЙ