Леон: Ырыабын быраҕар санаам суох

Комментарии От редакции

Поделиться:

НВК САХА – Бу күннэргэ эдэр ырыаһыт Леонид Григорьев – Леон сольнай кэнсиэрин тэрийбитэ. Түүҥҥү кулуупка олус аҕыйах киһи кэнсиэригэр кэлбититтэн хомойон, сахалыы ыллаан бүтэрин туһунан инстаграмҥа видео устан таһаарбыта. Леон “Тэтим” араадьыйаҕа быһа эфиргэ ыалдьыттаан, бу туһунан тугу саныырын, инники былааннарын кэпсээтэ, истээччилэр ыйытыыларыгар хоруйдаата. 

Араадьыйаҕа быһа эфиргэ “Завод” устуудьуйа салайааччыта, бастакы продюсера Ньургуйаана Яковлева эрийэн тиийдэ.

“Эдэр дьон, артыыстар сулус “ыарыылаахтара” баар суол. Ол Леоҥҥа эрэ буолбатах, атыттарга эмиэ көстөр. Ону кэлин өйдөөн көннөрүнэллэр. Леняны үчүгэйдик билэбин, кини ырыа да өттүнэн барбатаҕына, охтон-өлөн биэриэ суоҕа. Кини – спортсмен, үөрэхтээх, үлэлээх. Баҕар, хомойбут санаатыгар, ырыатын тохтото сылдьыаҕа. Ол эрээри кини айар-тутар киһи быһыытынан, син биир тахсыаҕа. Артыыс истээччилэрдээх буоллаҕына – баар. Артыыс, бастатан туран, истээччилэрин убаастыахтаах. Хомойбут да буоллаххына, ону көрдөрүмэ, таһаарыма”, – диэн баҕа санаатын эттэ.

ЛЕОН, ХАҺААҤҤЫТТАН ЫЛЛААН САҔАЛААБЫККЫНЫЙ?

Мин 17 сааспыттан ыллыыбын. Аармыйаттан кэлэн баран, үҥкүүлүөхпүн олус баҕарбытым.  “Завод” бөлөҕүн салайааччытыгар Ньургуйаана Яковлеваҕа суруйбутум. Онуоха: “Сарсын кэлээр”, – диэбитэ. Киниэхэ ырыаларбын ютубка көрдөрбүтүм. Ньургуйаана Николаевна үҥкүүгэ эрэ буолбакка, ырыа өттүгэр эмиэ үлэлэһиэн баҕарарын эппитэ. Онон кинилэри кытта Горнайга гастроллуу барсыбытым. Устунан клип устубуппут, үлэлэһэн барбыппыт. Сахам сирин син кэрийдим. Хоту сылдьан, сирин-уотун олус сөбүлээтим. Муомаҕа бастакы сольнай кэнсиэрбин туруорбутум.

ЫРЫАЛАРГЫН БЭЙЭҤ СУРУЙАҔЫН ДУО?

Бэйэм. Ол эрээри ыллым даҕаны, суруйбаппын. Туох эмит санааҕа ыллардахпына, ону дьоҥҥо-сэргэҕэ тиэрдиэхпин баҕардахпына, суруйабын. Кими даҕаны үтүктүбэппин. Ол курдук  “Нарын кыысчаан” диэн ырыабын урукку тапталбын санаан суруйбутум.

КРИТИКАНЫ ХАЙДАХ ЫЛЫНАҔЫН?

Туохтан мөҕүллүбүппүн толкуйдуур буоллаҕым дии. Аармыйаҕа сылдьан, алҕас атын омук уолун кытта бурайсан, кыранан дисбакка бара сыспытым. Онтум улахан уруок буолбута. Ол эрээри бэйэбэр эрэллээхпин.

ТУС ОЛОҔУҤ ТУҺУНАН КЭПСЭЭ ЭРЭ

Бииргэ төрөөбүт төрдүөбүт, мин ыал улахан оҕотобун. Төрөппүттэрим, эбэм миигин куруук өйүүллэр. Ол эрээри кинилэргэ мээнэ барытын кэпсээбэппин. Чугас даҕаны доҕотторум олох аҕыйахтар.

СААСКЫ БУЛТ САҔАЛАНАН, ЭР ДЬОН БАРЫ КУСКА СЫТАЛЛАР. ЭН ТӨҺӨ БУЛТААТЫҤ?

Булка сыһыаным суох, кутуйаҕы даҕаны сатаан өлөрбөт киһибин, кыылы-сүөлү ис-испиттэн аһынабын. Мин оннубар, хата, быраатым булчут. Ойууртан арахпат, кустуур, куобахтыыр.

БИЛИГИН ТУОХ БЫЛААННААХХЫНЫЙ?

От ыйыгар Аммаҕа Саха сирин норуоттарын оонньуулара буолаары тураллар. Чэпчэки атлетикаҕа сүүмэрдээһини ааһаары, күүскэ дьарыктана сылдьабын. Уһуҥҥа ыстаныыга бэлэмнэнэбин. Сүүмэрдээһини аастахпына, кыттыам. Билигин ыйааһын түһэрэ сылдьабын. Уонча сыллааҕыта бэйэм баҕабынан Дыгын оонньууларыгар кыттыбытым.

Истээччилэрбэр этиэм этэ, хомойбут санаабар, сахалыы ыллыырбын тохтотобун диэбитим. Ыҥырдахтарына, үөрүүнү кытта ханна баҕарар кыттарга бэлэммин. Билигин икки саҥа ырыалаахпын.  10 ырыаланнахпына, альбом таһаарыам.

Сольнай кэнсиэрдиибин диэн инстаграмҥа нэдиэлэ иннинэ биллэрбитим, бары кэлиэхпит бөҕө буолбуттара. Саатар 100 киһи кэлэн үөрдүө дии санаабытым. Дьокуускайга төһө киһи кэлэр эбит диэн бэрэбиэркэлээн көрбүтүм.

Араадьыйаҕа кэлэн кэпсээбиппиттэн чэпчээбит курдук буоллум. Киһини билбэккэ эрэ, мээнэ саҥараллара сыыһа дии саныыбын. Олох бүтэбин диэн эппэтэҕим, барытын үлүннэрэн, сыыһа суруйан тарҕаппыттар.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

два × три =

ЛЕНТА НОВОСТЕЙ