Мэҥэ Хаҥалас Петровка нэһилиэгэр саҥа кыбаарталы, хочуолунайы уонна оҕо уһуйаанын арыйдылар

Комментарии Общество и политика

Поделиться:

НВК САХА – Сомоҕолоһуу сыла Мэҥэ Хаҥалас улууһун Хара нэһилиэгэр үтүө түгэннэртэн саҕаланна. Манна олунньу 10 күнүгэр “Yрдьyнэхтээх” саҥа кыбаартал аһылынна. Кыбаартал хочуолунайдаах уонна “Кэрэчээн” икки этээстээх аныгы оҕо уһуйааннаах буолла диэн СӨ баһылыгын уонна бырабыыталыстыбатын пресс-сулууспата иһитиннэрэр.

Үөрүүлээх тэрээһиҥҥэ СӨ бырабыыталыстыбатын бэрэссэдээтэлин бастакы солбуйааччыта Алексей Стручков, тыа хаһаайыстыбатын миниистирэ Александр Атласов, Ил Түмэн дьокутааттара, Мэҥэ Хаҥалас уонна Хара салалталара, олохтоох дьон кытыннылар.

Федеральнай бырагыраама өйөбүлүнэн өрөспүүбүлүкэ нэһилиэктэригэр хас да кыбаартал тутулунна. Оттон Петровкаҕа чуолаан комплекснай тутуу оҥоһулунна. Генеральнай былаан быһыытынан, олорор дьиэлэртэн ураты хочуолунай, оҕо уһуйаана үлэҕэ киирдилэр. Асфальтаммыт 5 км суол тутулунна, сир учаастактара бары кэриэтэ гааска холбоннулар, уулуссалары сырдаттылар.

Yрдьyнэхтээх” кыбаарталы өссө да сайыннарар былааннаахтар. Манна оскуола, успуорт стадионун уонна да атын эбийиэктэри тутар санаалаахтар.

“Саҥа толору хааччыллыылаах кыбаарталга 40 тахса эдэр ыал олорор. Кинилэр тыа хаһаайыстыбатыгар, доруобуйа харыстабылын, үөрэхтээһин эйгэлэригэр үлэлииллэр-хамсыыллар. Эдэр исписсэлиистэр кэлэр буоланнар, улуус нэһилиэнньэтэ элбиир. Тыа сиригэр комплекснай тутуу өрөспүүбүлүкэ үлэтигэр инники күөҥҥэ сылдьар”, – диэтэ Алексей Стручков. 

“Yрдьyнэхтээх” саҥа кыбаартал элбэх оҕолоох ыаллара үөрүүлээх тэрээһиҥҥэ ыалдьыттары көрсөн, дьиэлэрин көрдөрдүлэр уонна үөрүүлэрин үллэһиннилэр, оҕолорун ситиһиилэрин кэпсээтилэр.

Элбэх оҕолоох Адамовтар дьиэ кэргэн сир учаастагын ылан, толору хааччыллыылаах дьиэ туттубуттар. Ыал ийэтэ Жанна Адамова нэһилиэк поликлиникатыгар оҕо бырааһынан үлэлиир. “Земскэй доктор” бырагырааматыгар кыттыһан, улууска үлэлии кэлбит. Ыал тыа сиригэр олороруттан, үлэлиириттэн-хамсыырыттан үөрэр.

“Өйөбүл иһин махтанабыт. Манна олорорбутуттан үөрэбит”, – дэһэллэр.

Оттон “Кэрэчээн” оҕо уһуйаанын иитээччитэ Февронья Сидорова – оскуола иннинээҕи үөрэхтээһиҥҥэ улахан уопуттаах үлэһит. Оҕо уһуйаана 1975 сыллаахха тутуллубут эргэ дьиэҕэ баар эрдэҕиттэн үлэлиир.

“Эһиил уһуйааммыт 45 сылын туолар. Үбүлүөй иннинэ саҥа дьиэлэммиппититтэн олус үөрэбит. Бу – олохтоохторго бэртээхэй бэлэх буолла. Тутуу 2018 сыллаахха саҕаламмыта. Оттон номнуо бүгүҥҥүттэн уһуйааммыт киэҥ-куоҥ, кыраһыабай дьиэҕэ саҥа олоҕун саҕалыыр. Оҕо сайдарыгар үчүгэй усулуобуйа тэрилиннэ”, – диэтэ Февронья.

Үөрүүлээх тэрээһиҥҥэ “Арктика-Строй”, “Электромонтаж” ХЭУо-ларга махтал тылларын эттилэр. Бу тэрилтэлэр ыйыллыбыт болдьох иһигэр кыбаарталга саҥа эбийиэктэри туттулар. Маны таһынан наҕараадалары туттардылар.

 



Поделиться:




Наш Telegram
Отправляйте свои новости на горячую линию: +7(914)2734488

Добавить комментарий

Ваш e-mail не будет опубликован. Обязательные поля помечены *

три × 5 =

ЛЕНТА НОВОСТЕЙ