Мэҥэлэр ХХ «Манчаары оонньууларыгар» үрдүк ситиһиилэннилэр (ВИДЕО)

Комментарии Спорт и культура

Просмотров: 36

NVK-ONLINE.RU – От ыйын 6-9 күннэригэр Үөһээ Бүлүүгэ спорт национальнай көрүҥнэригэр үбүлүөйдээх ХХ «Манчаары оонньуулара» үрдүк таһымҥа буолан аастылар. Мэҥэ Хаҥалас улууһун хамаандата ситиһиилээхтик кыттан, иккис бөлөххө 3 бочуоттаах миэстэни ылары ситистэ.

Саха норуотун легендарнай геройа Манчаары Баһылай сиэттэрэ мэҥэ хаҥаластар  үбүлүөйдээх 20-ис “Манчаары оонньууларыгар” 102 спортсмен балаһыанньаҕа киирбит 11 көрүҥҥэ барытыгар кытыннылар. Ол курдук улуус хамаандата ааспыт спартакиадаларга сорох көрүҥнэргэ инники күөҥҥэ сылдьыбыт эбит буоллаҕына, бу сырыыга көрдөрүү араас буолла.

Спорт аата спорт. Маннык улахан түһүлгэҕэ ситиһии кэлэригэр хас биирдии спортсмен көлөһүнүн тоҕор. Биирдиилээн спортсменнарбыт ситиһиилэриттэн бэлиэтиир эбит буоллахха, атах оонньуутугар оҕолорго Петр Филиппов кылыыга уонна ыстаҥаҕа маҥнайгы миэстэлэри ылары ситистэ. Кылыыга 44 миэтирэ 31 см, оттон ыстаҥаҕа 43 миэтирэ 89 см ыстанан, өрөспүүбүлүкэ рекордун олохтоото.

Хапсаҕайга уонна хотугу многоборьеҕа оҕолорго Айаал Лыткин уонна Егор Терентьев ситиһиилээхтик кыттан, маастар нуорматын толордулар. Хапсаҕайга эр дьоҥҥо Алексей Варламов чөмпүйүөн үрдүк аатын ылла. Мас тардыһыытыгар 5 чөмпүйүөн үрдүк аатын оҕолорго Иван Петров, дьахталларга Анна Охлопкова, Туйаара Орлова, эр дьоҥҥо Алексей Стручков, бэтэрээннэргэ Сергей Кузьмин ылары ситистилэр. Гиирэ спордугар улахан ыйааһыҥҥа эр дьоҥҥо Алексей Тастыгин уонна Владимир Михайлов кыайыылаах үрдүк аатын ыллылар.

Бу спартакиадаҕа буулдьанан ытыыга улахан ситиһии көрдөрүлүннэ. Үс кыһыл көмүс мэтээлгэ Гаврил Сидоров, Анна Захарова уонна оҕолорго Марина Бандерова тигистилэр. Гаврил Сидоров 291 очкону ылан, өтөрүнэн буолбатах рекорду олохтоото. Хамаанда уопсайа 6 мэтээли ылан, эрэллэххтик маҥнайгы миэстэни хааччынна.

Бу курдук мэҥэ хаҥаластар уопсай түмүккэ иккис бөлөххө үһүс бочуоттаах миэстэҕэ тигистилэр.



Добавить комментарий

Ваш e-mail не будет опубликован. Обязательные поля помечены *

16 + шесть =