Муус устар 18 күнэ – аан дойдутааҕы пааматынньыктар уонна историческай суолталаах миэстэлэр күннэрэ (ВИДЕО)

Комментарии Общество и политика

Просмотров: 19

NVK-ONLINE.RU – 1983 сыллаахха ЮНЕСКО иһинэн баар памаатынньыктары уонна бэлиэ сирдэри харыстыыр сэбиэт этиитинэн, ЮНЕСКО култуура нэһилиэстибэтин киинэ муус устар 18 күнүн аан дойду үрдүнэн пааматынньык уонна историческай суолталаах миэстэлэр күннэринэн бигэргэппитэ. Россия үрдүнэн 200 тыһыынчатан тахса история уонна култуура пааматынньыктара баар эбит буоллахтарына, мантан 1824-э Саха сиригэр ааҕыллар. Бүгүн түмэллэргэ босхо экскурсиялар, субуотунньуктар буоллулар.

Опера уонна балет тыйаатырын үлэһиттэрэ Суорун Омоллоон пааматынньыгын сылга хаста эмитэ тахсан ыраастыыллар. Муус устар 18 күнүгэр пааматынньыгы ыраастыыллара номнуо үтүө үгэскэ кубулуйда.

Былырыын саҥа тэриллибит Саха сиринээҕи култуурунай нэһилиэстибэ эбийиэктэрин харыстыыр Департамент үлэһиттэрэ бүгүҥҥү күнү археология түмэлиттэн саҕалаатылар. Нэһилиэстибэ федеральнай, республикатааҕы уонна олохтоох дьаһаныы көрүүлэригэр арахсар. Уопсайа 120-тэн тахса федеральнай суолталаах пааматынньыктар бааллар.

Биир саамай киэҥ туттар пааматынньыкпытынан 1921 сыллаахха Гаврил Ксенофонтов аан бастаан суруйан, көрдөрөн, уруһуйдаан хаалларбыт Өлүөнэ очуостарын суруктара буолаллар. Өссө биир холобур, аан дойдуга сэдэх, соҕотох пааматынньык – Шергин шахтата. Реестргэ ураты архитектуралаах, былыргы тутуулар, таҥара дьиэлэрэ, материальнай, киһи уонна айылҕа ситимин көрдөрөр эбийиэктэр, ытык сирдэр, ансаамбыллар киирэллэр.

Киһи атаҕа үктэнэн көрбөтөх ураты сирдэрэ үгүстэр. 5 сылга биирдэ хайаан да көрүөхтээхтэр-истиэхтээхтэр. Быйыл Департамент аан маҥнайгытын Эдьигээҥҥэ, Алдаҥҥа баар пааматынньыктар туруктарын билсэр былааннаах. Онтон өскөтүн эбийиэксудаарыстыба харалтатыгар киирдэҕинэ, уларытар, көһөрөр көҥүллэммэт. Сокуон ирдэбилинэн, холуобунай эппиэтинэскэ тардыллыахха сөп.

Департамент ураты суолталаах пааматынньыктары киэҥ эйгэҕэ таһаарар сыаллаах. Ол иитинэн сайтарыгар бары иһитиннэриини билсиэххэ сөп. Биир пааматынньык устуоруйата диэн анал сыһыарыы тахсар буолла. Департамент ыйааҕынан, Абакаяда уонна Семен Дежнев, маны сэргэ куораты төрүттээбит Петр Бекетов пааматынньыктарын республикатааҕы суолталаах култуура нэһилиэстибэтин эбийиэктэрин реестригар киллэрдилэр.



Добавить комментарий

Ваш e-mail не будет опубликован. Обязательные поля помечены *

2 × 1 =