140-тэн тахса спортсмен Дьокуускайга мас тардыһыы аһаҕас чемпионатыгар кыттар

Киин куоракка ыытыллар «Көмүс мас» мас тардыһыы өрөспүүбүлүкэтээҕи чемпионатыгар 20 улуустан уопсайа 143 спортсмен кыттар. Бу туһунан куорат дьаһалтатын пресс-сулууспата иһитиннэрэр.

Күрэхтэһии олунньу 6-7 күннэригэр «Модун» спорт киинигэр көрөөччүтэ суох онлайн-трансляциянан ыытыллар.

«Саха төрүт оонньуута аан дойдуга тарҕаммытыттан олус үөрэбит. Мас тардыһыытын өрөспүүбүлүкэҕэ эрэ буолбакка араас дойдуларга көрөллөр. Мас тардыһыытын таптааччыларга бу дьиҥнээх бырааһынньык буолар», — диэтэ куорат баһылыгын э.т. Евгений Григорьев.

2021 сылга күрэхтэһии эдэрдэргэ аҕыс ыйааһыҥҥа ыытыллыаҕа, оттон бэтэрээннэр истэригэр — түөрт.

««Көмүс мас» күрэхтэһии сүрүн быраабылаларын 1979 сыллаахха толкуйдаабыппыт, билигин эмиэ онон ыытыллар. Күрэхтэһии Дьокуускай аһаҕас чемпионатын балаһыанньатын ылла. Быйылгы фавориттарынан Мэҥэ Хаҥалас, Уус Алдан уонна Дьокуускай спортсменнара буолаллар», — диэтэ чемпионат кылаабынай судьуйата Дмитрий Шарин.