17-с кыбаартал 12 хаарбах туруктаах дьиэтин олохтоохторо көһөрүлүннүлэр

Дьокуускай куорат 17-с кыбаарталын 12 хаарбах туруктаах элбэх кыбартыыралаах дьиэтин олохтоохторо көһөрүлүннүлэр. Бу туһунан киин куорат дьаһалтатын пресс-сулууспата иһитиннэрэр.

«160 кыбартыыраттан 79 көһөрүлүннэ, олортон 48-гар атын дьиэ бэрилиннэ. 31 бас билээччигэ харчынан толуйуу төлөннө», — диэн этиллэр.

Атын олорор дьиэ оннугар харчынан төлөбүрү ылыан баҕарбыт олохтоохторго уопсайа 62 мөлүйүөн солкуобай кэриҥэ суума төлөннө. Өссө сэттэ олохтооххо 2020 сыл түмүктэниэр диэри атын дьиэ бэриллиэҕэ.

«Күһүн-саас эргэ дьиэбитин уу ылара. Онтон сылтаан кыбартыыра иһэ куруук сииктээх уонна түүнүктээх буолара. Ол үрдүнэн куруутун тымныы буолан обогреватель эрэ көмөлөһөрө», — диэн 17 кыбаарталга 25-тэн тахса сыл олорбут Вера Сухарева кэпсиир. Хаарбах уонна саахалланар туруктаах дьиэлэртэн көһөрүү бырагырааматын көмөтүнэн, бу дьыл олунньу ыйыгар дьиэ кэргэнэ Воинскай уулуссаҕа баар саҥа элбэх кыбартыыралаах таас дьиэҕэ көһөн киирбит.

Көһөрүү бырагырааматын олоххо киллэрии саҥа тутулла турар өссө киллэриллибэтэх, эбэтэр тутуллан бүтэн киллэриллибит дьиэлэргэ тутааччыттан кыбартыыралары ылыы, иккис ырыынак дьиэлэрин уонна бас билээччилэртэн саахалланар туруктаах дьиэлэри атыылаһыы суолунан ыытыллар.

Федеральнай бырагыраама бастакы түһүмэҕэр (2012-2018 сылларга) Дьокуускайга 2012 сыл тохсунньу 1 күнүгэр диэри хаарбах туруктааҕынан ааҕыллыбыт 226 дьиэ хабыллыбыта. Билигин көһөрүү бырагырааматын иккис түһүмэҕэ ыытыллар (2019-2025 сылларга), манна 2017 сыл тохсунньу 1 күнүгэр диэри хаарбах туруктааҕынан ааҕыллыбыт 166 дьиэ киирдэ.