2020 сыл саҥатыгар биэнсийэ үрдүүрэ күүтүллэр

Россияҕа 2019 сылтан биэнсийэҕэ тахсар сааһы улам үрдэтэргэ саҥа быраабылалар киирбиттэрэ.

Биэнсийэ пуондатын Саха сиринээҕи салаатын салайааччыта Георгий Степанов иһитиннэрбитинэн, былырыыҥҥы сылы кытта холоотоххо, өрөспүүбүлүкэ үрдүнэн биэнсийэҕэ тахсыы 12 268-тан 9 537-ҕэ диэри — 22%-нан аҕыйаабыт. Оттон дойду үрдүнэн 55% кыччаабыт. Бу туһунан СӨ баһылыгын уонна бырабыыталыстыбатын пресс-сулууспата иһитиннэрдэ.

«Россия үрдүнэн кырдьан биэнсийэҕэ тахсыы, былырыыҥҥыга тэҥнээтэххэ, 68% аҕыйаабыт буоллаҕына, Саха сиригэр — 34%», — диэтэ.

Степанов этэринэн, урукку сылларга тэҥнээтэххэ, 2019 сылга билиҥҥи инфляция таһымыттан лаппа биэнсийэ үрдээбит.

«Тохсунньуга үлэлээбэт биэнсийэлээхтэргэ — 140 тыһыынча кэриҥэ киһиэхэ страховой биэнсийэни 7,05% -нан үрдэппиппит. 2018 сылга диэри үлэлээбит биэнсийэлээхтэргэ атырдьах ыйыгар страховой биэнсийэҕэ уларытыылары киллэрбиппит. Муус устар 1 күнүттэн социальнай биэнсийэ үрдээбитэ».

Бары биэнсийэлээх дьоҥҥо орто страховой биэнсийэ 977 солкуобайынан үрдээбитэ. Үлэлээбэт биэнсийэлээхтэргэ өрөспүүбүлүкэ үрдүнэн 1 445 солкуобайынан эбиллибитэ.

«Тохсунньу ыйга биэнсийэ эбиллэрэ күүтүллэр. Үлэлээбэт биэнсийэлээхтэргэ барыларыгар эбиллиэхтээх. Инфляция сабаҕаланар таһымыттан үрдүк буолуоҕа, ол эбэтэр 6,6%-ҥа тэҥнэһиэ», — диэн Степанов эттэ.

2019 сылга тыа сирин олохтоохторугар 30 сылтан аҕыйаҕа суох тыа хаһаайыстыбатыгар үлэлээбит дьоҥҥо биэнсийэлэрин үрдэппиттэрэ. Биэнсийэ пуондатын Саха сиринээҕи салаата иһитиннэрэринэн, 3,5 тыһыынчаттан тахса киһи ылбыт. 2019 сыл бүтүөр диэри олорор сирдэринэн Биэнсийэ пуондатын клиент сулууспатыгар тиийэн, хос аахтарыахтарын сөп.