2020 сыл сэтинньи ыйыгар АЛРОСА сэдэх оруосабай бриллианы атыылыаҕа

АЛРОСА сэтинньи 11 күнүгэр, Женеваҕа, 14,83 карат ыйааһыннаах, Саха сиригэр хостоммут, сэдэх оруосабай дьүһүннээх кырыыламмыт алмааһы аукциоҥҥа таһаарыаҕа. Бу туһунан ТАСС иһитиннэрэр.

Sotheby’s аукцион ыытыллар дьиэтин ювелирнай салаатын салайааччыта Гари Шулер, эрдэ аукциоҥҥа тахсыбыт кырыыламмыт оруосабай алмаастартан саамай улахан кээмэйдээхтэрэ буоларын, Reuters ааҕыныстыбаҕа иһитиннэрдэ.

«Оруосабай алмаас айылҕаҕа олох сэдэхтик көстөр, кэлиҥҥи кэмҥэ баай дьон бриллианы атыылаһар баҕата улаатта. Таас 38 мөлүйүөн долларга атыыланыа диэн былаанныыбыт», — диэн Гари Шулер бэлиэтээн эттэ.

Кини этэринэн, Михаил Фокин туруорбут «Призрак Розы» биллиилээх балетын чиэһигэр ааттаммыт оруосабай бриллиант — Россияҕа көстүбүт сэдэх дьүһүннээх, саамай улахан таас буолар.

«Оруосабай алмаастар биир эрэ бырыһыаннара 10 караттан улахан ыйааһыннаах буолар», — диэн Sotheby’s бэрэстэбиитэлэ чуолкайдаан эттэ.

27,85 караттаах оруосабай алмаас 2017 сыл алтынньы 9 күнүгэр Саха сирин «Эбэлээх» саппаас баайдаах сириттэн хостоммута. Россия алмаас хостооһунун историятыгар кини саамай улахан оруосабай таас буолбута уонна The National Jeweler таһаарыы быһаарыытынан сыл бастыҥ булумньутунан ааттаммыта.

Алмаас Москва куоракка, «АЛРОСА бриллианнара» тэрилтэҕэ кырыыламмыта. Ол түмүгэр, маастардар 14,83 караттаах «Призрак розы» бриллианы таһаарбыттара.