2020 сылга 35 млрд кэриҥэ солкуобай Саха сирин экономикатын өйөбүлүгэр ыытыллыбыт

Коронавирус ыарыытын кэмигэр өрөспүүбүлүкэ экономиката атаҕар турарыгар уонна сөргүтүллэригэр өйөбүл быһыытынан 35 миллиард солкуобай кэриҥэ көрүллүбүт.

Бу туһунан бырабыыталыстыба бэрэссэдээтэлин бастакы солбуйааччы Кирилл Бычков, олунньу 13 күнүнээҕи бырабыыталыстыба отчуотугар иһитиннэрдэ.

«Тыҥааһыннаах кэм ордук экономикаҕа охсуулаах буолла. Бу — регион валовай бородууктатын уонна дохуоту аччатыы, үлэтэ суох дьон элбээһинэ, бүддьүөт дефицитэ», — диэтэ кини.

2020 сылга салаалары өйүүргэ уопсайа 35 миллиард солкуобай тыырыллыбытын Кирилл Бычков бэлиэтээн эттэ, онтон сэттэ миллиард солкуобайа — систиэмэни олохтуур тэрилтэлэр өйөбүллэригэр.

«Биир миллиард солкуобай аччыгый уонна орто урбаан өйөбүлүгэр тыырыллыбыта — 13 тыһыынча урбаанньыт көмөнү араас быһыылаахтык ылла: субсидия, нолуокка чэпчэтии, нолуок төлөбүрүн болдьоҕун уһатыы. Доруобуйа харыстабылын өйөбүлүгэр тоҕус миллиард солкуобай көрүллүбүтэ», — диэн вице-премьер бэлиэтээтэ.

Маны таһынан, 160 тыһыынча оҕолоох дьиэ кэргэн төлөбүр уонна босуобуйа быһыытынан уопсайа сэттэ миллиард солкуобай көмөнү ылла.

Үлэтэ суох хаалбыт дьон өйөбүлүгэр икки миллиард солкуобайтан тахса суумалаах көмө оҥоһулунна. Ол курдук, 57 тыһыынчаттан тахса киһи көмөнөн туһанна.

«Ылыллыбыт миэрэлэр көмөлөрүнэн, үлэтэ суох дьон элбээһинэ уонна дохуот түһүүтүн ахсаана тохтоото», — диэтэ Кирилл Бычков.