2020 сылга хоту улуустарга бородуукта тиэрдиигэ 135 мөл.солк. ыытылынна

2020 сылга Саха сирин хоту улуустарыгар тыа хаһаайыстыбатын бородууксуйатын тиэрдиигэ уонна булду, балыгы тиэйэн аҕалыыга өрөспүүбүлүкэ бүддьүөтүттэн 135,25 мөлүйүөн солкуобай ыытылынна. Бу туһунан СӨ тыа хаһаайыстыбатын министиэристибэтин пресс-сулууспата иһитиннэрэр.

Үбүлээһин 100 %-н туолла. Таһаҕаһы тиэйии салгынынан, уунан уонна сиринэн оҥоһуллар. Арктика уонна хоту улуустартан төннөр тырааныспар булт-алт бородууксуйатын тиэйэн аҕалар.

Быйыл Арктика уонна хоту улуустарын олохтоохторугар 811,6 туонна хортуоска уонна оҕуруот аһа тиэрдилиннэ. Абыйга, Булуҥҥа, Аллайыахаҕа, Эдьигээҥҥэ, Аллараа халымаҕа, Орто Халымаҕа уонна Усуйаанаҕа уу суолунан 339,6 туонна оҕуруот аһа тиэрдилиннэ, ол иһигэр 211 туонна — хортуоска.

Сөмөлүөтүнэн уонна бөртөлүөтүнэн 133 туонна социальнай суолталаах бородуукта тиэрдилиннэ, ону таһынан улуустарга эбии 159 туонна ас-үөл ыытылынна.

Ахсынньы 24 күнүн тургунан барыта 145,5 туонна бородуукта тиэрдилиннэ, бу былаан 91 %-гар тэҥнэһэр. Инники этиллибитинэн, бүгүн-сарсын Орто Халыма улууһун сэлиэнньэлэригэр эбии «күөх рейстэри» ыытыы оҥоһуллуоҕа.