2020 сылга национальнай библиотека муҥутуур ахсааннаах электроннай кинигэни биэрдэ

2020 сылга коронавирус ыарыытын кэмигэр өрөспүүбүлүкэтээҕи национальнай библиотека муҥутуур ахсааннаах электроннай кинигэни биэрдэ.

Коронаврирус ыарыыта турбут кэмигэр култуура эйгэтигэр үлэ туһунан Саха сирин култууратын министиэристибэтин баһылыга Юрий Куприянов кэпсээтэ.

«Биһиги салаабытыгар сэттэ тыһыынчаттан тахса киһи үлэлиир. Тэрилтэлэр сабыллан да турдаллар, үлэһиттэргэ хамнас төлөннө. Биһиги үлэбит тохтоон хаалбатаҕа, бэлэмнэниилэр барыта онлайн көрүҥүнэн ыытылла турбуттара», — диэтэ кини.

Саха сирин национальнай библиотекатын дистанционнай үлэтин ситиһиитин миниистир бэлиэтээн эттэ.

«Бу сылларга бастакытын абоненнерга электроннай кинигэни биэрии 2,5 мөлүйүөнтэн тахса ахсааҥҥа тиийдэ. Эрдэ бу көрдөрүү 300 тыһыынча кэриҥэ этэ», — диэтэ Юрий Куприянов.

Кини этэринэн, хааччахтааһыннары аахсыбакка, култуура салаата бэйэтин ис кыаҕын тутан хаалла.

«Биһиги — саамай ааҕар регион, «Кинотавр» бириэмийэ лауреаттара буоллубут, балет уонна үрдүкү музыка оскуолатын иитиллээччилэрэ бары онлайн-куонкурустарга лауреат үрдүк аатын ыллылар», — диэн СӨ култууратын министиэристибэтин баһылыга бэлиэтээтэ.