2020 сылга Саха сиригэр 100-тэн тахса киһи көһөн кэлбит

2020 сылга өрөспүүбүлүкэҕэ уопсайа 104 киһи көһөн кэлбит, кинилэргэ гарантированнай медицинэ өҥөтө уонна социальнай көмөлтө бэрилиннэ. Бу туһунан нэһилиэнньэ дьарыктаах буолуутун өрөспүүбүлүкэтээҕи судаарыстыбаннай кэмитиэтин пресс-сулууспата иһитиннэрэр.

Көһүү уонна биир дойдулаахтар адаптацияларын үлэтэ «Кыраныысса таһыгар олорор биир дойдулаахтар баҕа өттүлэринэн Саха сиригэр көһөллөрүгэр көмөлөһүү» бырагыраама чэрчитинэн ыытыллар.

«Бу бырагыраама Саха сиригэр 2018 сылтан үлэлиир. Бу кэм иһигэр өрөспүүбүлүкэҕэ 320 омук сирин гражданнара көһөн кэллилэр», — диэн иһитиннэриигэ этиллэр.

Бырагыраама көмөтүнэн судургутук Россия гражданина буолар кыах бэриллэр. Бырагыраама кыттыылааҕа үлэҕэ киириигэ, социальнай төлөбүргэ, судаарыстыбаннай уонна муниципальнай өҥөнү ылыыга өйөбүллээх буолар.

Ол курдук, 83 кыттааччыга уонна дьиэ кэргэнигэр материальнай, 15 киһиэхэ дьиэ куортамын сорох чааһыгар көмө оҥоһулунна. 35 киһиэхэ уонна кини дьиэ кэргэнигэр медицинэ туоһулааһыныгар ороскуоту уйуннулар.

Пресс-сулууспа иһитиннэрэринэн, Саха сиригэр көһөн кэлэргэ Арменияҕа, Казахстаҥҥа, Кыргызтаҥҥа уонна Таджикистаҥҥа олорор биир дойдулаахтарбыт ордук интэриэстээхтэр.

Бырагырааманан көһөн кэлбиттэр истэригэр учууталлар, медицинэ үлэһиттэрэ, инженердэр уонна техническэй хайысха үлэһиттэрэр бааллар. Үлэ исписэлиистэрин ылан көрдөххө — машинистар, хайа үлэтигэр хаһааччылар, электрослесарьдар, суоппардар.