2021 сылга Алдаҥҥа онкологическай ыарыылаах дьоҥҥо көмө киин үлэлиэҕэ

Алдан оройуонугар онкологическай көмө амбулаторнай киинэ аһыллара былааннанар.

Бу туһунан СӨ доруобуйа харыстабылын миниистирэ Елена Борисова Instagram нөҥүө быһа эпииргэ иһитиннэрдэ.

«Өрөспүүбүлүкэ улуустарыгар онкодиспансер салаалара аһыллыахтара — онкологическай көмө амбулаторнай кииннэрэ. Кииҥҥэ онкологиянан ыалдьыбыт дьон көрдөрүнэр, химиотерапия ылар уонна диагностикаланар кыахтаныахтара. Билигин кыраапыкка Алдан турар», — диэтэ кини.

СӨ доруобуйа харыстабылын министиэристибэтэ иһитиннэрэринэн, 2020 сылга Өлүөхүмэҕэ, Хаҥаласка, Бүлүүгэ уонна Ленскэйгэ кииннэр аһыллыбыттар.