2021 сылга булт кэмин болдьоҕо уларыйар

Саха сирин бултка уонна булт хаһаайыстыбатыгар сэбиэтэ Ил Дархан Айсен Николаев булт көрүҥнэрин уонна болдьоҕун быһаарыы туһунан ыйааҕын бырайыагын көрдө. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.

«Абый, Эдьигээн, Өлөөн уонна Орто Халыма улуустарыгар хотугу кыыл табаҕа бултааһын туһунан этиилэр учуоттаннылар уонна булт көҥүлүн болдьоҕо чуолкайданна. Ону таһынан эбии улуус дьаһалталарын кытта куска уонна көтөргө булт болдьоҕо чуолкайданна», — диэн этиллэр.

Ыйаах бырайыагар сааһын сиппит тайахха булт болдьоҕо балаҕан ыйын 15 күнүттэн ахсынньы 25 күнүгэр диэри диэн быһаарылынна. Хотугу кыыл табаҕа булт болдьоҕо атырдьах ыйын 1 күнүттэн 2022 сыл тохсунньу 31 күнүгэр диэри, тыатааҕыга күһүҥҥү булт атырдьах ыйын 1 күнүттэн ахсынньы 31 күнүгэр диэри, сааскы булт муус устар 20 күнүттэн бэс ыйын 10 күнүгэр диэри диэн быһаарылынна, бөрөҕө — атырдьах ыйын 1 күнүттэн кулун тутар 31 күнүгэр диэри.

Саҥа быраабыланан андаатарга булт болдьоҕо олунньу 28(29) күнүгэр диэри көҥүллэнэр, онон сибээстээн Россия айылҕа харыстабылыгар министиэристибэтигэр булт болдьоҕун муус устар 1 күнүгэр диэри уһатыы туһунан этии ыытыллыаҕа.

Маны таһанан улуустарынан куска уонна көтөргө булт болдьоҕо быһаарылынна. Сүрүн болдьохтон ураты атыыр куска тыыннаах мончуугу туһанан бултааһын болдьоҕо туспа ыйыллар буолуоҕа.

Көрүү кэнниттэн сэбиэт докумуон бырайыагын бигэргэттэ уонна Ил Дархан көрүүтүгэр киллэрэр туһунан быһаарыы ылла.