2021 сылга кыра урбаан былааннаммыт бэрэбиэркэтигэр мораторийы уһаттылар

Сибидиэнньэлэрэ кыра уонна орто урбаан биир кэлим реестригэр киирбит юридическай сирэйдэр уонна урбаанньыттар былааннаммыт бэрэбиэркэлэрин бобуу 2021 сылга уһаата.

РФ бырабыыталыстыбатын туһааннаах уурааҕа тохсунньу 1 күнүттэн олоххо киирдэ. Бу уураах 2021 сылга кыра урбаан тэрилтэлэригэр бэрэбиэркэни дистанционно, эбэтэр аудио, видео-сибээс нөҥүө ыытар кыах биэрэр.

2021 сыл былааныгар киирбит выездной бэрэбиэркэ инспекционнай бэрэбиэркэнэн солбуллуон уонна уһуна 10 үлэ күнүнэн хааччахтаныан сөп.

2021 сылга, уураахха көрүллүбүт миэрэлэртэн көрдөххө, 2020 уонна ол иннинээҕи сыллардааҕар бэрэбиэркэ үрдээбэтэ сабаҕаланар. Бу көмөтүнэн, элбэх ахсааннаах кыра урбаан тэрилтэлэригэр административнай ноҕурууска аччыаҕа.