2021 сылга саҕалааччы фермердэри өйөөһүҥҥэ 102,7 мөл.солк. көрүллүөҕэ

2021 сылга Россия бэрэсидьиэнэ Владимир Путин көҕүлээһининэн үлэлиир «Аччыгый уонна орто урбаан» национальнай бырайыак иитинэн Саха сиригэр саҥа саҕалааччы фермердэри өйөөһүҥҥэ 102,7 мөлүйүөн солкуобай көрүллүөҕэ. Бу туһунан ТАСС иһитиннэрэр.

«2021 сылга өрөспүүбүлүкэтээҕи «Агростартап» куонкурус граннарын уопсай кээмэйэ 102,7 мөл. солкуобайга тэҥнэһиэҕэ. Бу үп өрөспүүбүлүкэ уонна дойду хааһыналарыттан көрүллүөҕэ», — диэн СӨ тыа хаһаайыстыбатын министиэристибэтэ тириэрдэр.

«Агростартап» куонкурус Саха сиригэр үһүс сылын ыытыллар. Кыайыылаахтар хаһаайыстыба хайысхатыттан көрөн 6 мөл. солкуобайга тиийэ ылыахтарын сөп.

Көрүллүбүт үбү сүөһүнү, тиэхиньикэни, бородууксуйаны оҥорон таһаарар оборудованиелары, сир учаастагын ылыыга, ону тэҥэ эбийиэктэри инженернэй ситимнэргэ холбооһуҥҥа уо.д.а. туһаныахха сөп.