2021 сылтан ийэ хапытаалын кээмэйэ 23 тыһыынча солкуобайынан үрдүөҕэ

2021 сыл тохсунньу 1 күнүттэн ийэ хапытаалын суумата 640 тыһыынча солкуобай кэриҥэ буолуоҕа. Бу туһунан дойду бэрэсидьиэнэ Владимир Путин Федерация Сэбиэтин чилиэттэрин кытта көрсүһүүтүн кэмигэр иһитиннэрдэ.

«Норуот санаатынан Россия төрүт сокуонугар дойду судаарыстыбаннай бэлиитикэтин биир тутаах болҕомтотунан оҕолор бэлиэтэннилэр, ону тэҥэ кинилэр бары өттүнэн сайдыыларыгар бастыҥ кыахтары үөскэтии. 2020 сыллааҕы туһаайыыга демографияны уонна дьиэ кэргэни өйөөһүҥҥэ комплекснай миэрэлэр этиллибиттэрэ. Кэлэр үс сыллааҕы бүддьүөт бырайыагар бары ирдэнэр ресурсалар уурулуннулар», — диэн эттэ.

Владимир Путин иһитиннэрэринэн, бу сыаллары олоххо киллэрии ороскуота 2020 сылга 0,7 триллион солкуобайтан, 2023 сылга 1,2 триллион солкуобайга диэри үрдүөҕэ.

«Быйыл ийэ хапытаалын кээмэйэ 616,6 тыһыынча солкуобайга диэри үрдээтэ уонна инникитин сыллата индексацияланыаҕа», — диэн дойду бэрэсидьиэнэ бэлиэтээтэ.

2021 сыл тохсунньу 1 күнүттэн ийэ хапытаала 23 тыһыынча солкуобайынан үрдүөҕэ уонна 639 432 солкуобайга тэҥнэһиэҕэ. Онуоха бастакы оҕо төрөөһүнүгэр көрүллэр төлөбүр суумата 484 тыһыынча солкуобай кэриҥэ буолуоҕа.