2022 сылтан Анаабыр улууһугар таас дьиэлэри тутан саҕалыахтара

2022 сылтан Анаабыр улууһугар таас дьиэлэри тутууга көһүүнү былаанныыллар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата тириэрдэр.

Бу туһунан бүгүн, атырдьах ыйын 13 күнүгэр улуус баһылыга Иван Семенов Ил Дархан Айсен Николаевы кытта көрсүһүү кэмигэр иһитиннэрдэ.

Түөрт сыл иһигэр хаарбах уонна саахалланар туруктаах дьиэлэртэн көһөрүү бырагырааматынан улуус 800-тэн тахса олохтооҕо көһөрүллүөхтээҕин улуус баһылыга иһитиннэрдэ. Сыллата иккилии элбэх кыбартыыралаах дьиэ тутуллара былааннанар. Ол курдук быйыл икки 12-кыбартыыралаах дьиэ тутуллуохтаах, эһиил — икки аҕыс кыбартыыралаах.

«Билигин дьиэлэр НХМ технологиянан мас панеллартан тутуллаллар. Ол эрээри биһиги таас дьиэлэри тутууга көһүүгэ соруннубут. Бу үлэлэри 2022 сылтан саҕалыыры былаанныыбыт. Ол иһин хайыы үйэ карьеры оҥорууну саҕалаатыбыт. Эһиил тиэхиньикэлэри ылыыны саҕалыахпыт: дробилка, шлакоблоктары оҥорор оборудование уо.д.а.», — диэн Иван Семенов эттэ.

Улууска саҥа социальнай эбийиэктэр уонна дьиэлэр тутуллууларын учуоттаан, былырыын Үрүҥ Хайаҕа саҥа хочуолунай үлэҕэ киирбитэ. Өссө биир тутулла турар хочуолунай эһиил Сааскылаахха үлэҕэ киириэҕэ.

«Арктическай улуустар олохтоохторугар сылаас, сырдык уонна үйэлээх дьиэлэр наадалар. Таас дьиэлэри тутууга көһүү нэһилиэнньэ олоҕун таһымын үрдэтиэҕэ», — диэн Айсен Николаев бэлиэтээтэ.