203-с микрооройуоҥҥа туртаһы түҥнэри көппүт суоппары буллулар

Судаарыстыбаннай суол инспиэктэрдэрэ бэҕэһээ, сэтинньи 19 күнүгэр, Дьокуускай 203-с микрооройуонугар туртаһы түҥнэри көппүт суоппары быһаардылар. Бу туһунан суолга куттал суох буолуутун хааччыйар судаарыстыбаннай инспиэксийэ управлениетын өрөспүүбүлүкэтээҕи салаатын пресс-сулууспата иһитиннэрэр.

Буруйдаах масыына ыытар дастабырыанньата суох 25 саастаах олохтоох киһи буоллара билиннэ.

«Сэтинньи 19 күнүгэр олохтоох бириэмэнэн 12.35 чааска балыыһаттан дьиэлээн иһэн туртаһы түҥнэри көппүтүм. Айаннаан иһэн хараҕым кытыытынан тротуар устун ыт сүүрэн иһэрин көрбүтүм, массыынабар сааллыбытыгар биирдэ туртас буоларын өйдөөбүтүм. Реакциялыы охсубатаҕым», – диэн эр киһи инспиэктэрдэргэ быһаарда.

Кини этэринэн, кыылы бэтэринээрнэй клиникэҕэ илдьээри массыынатын багажнигыгар укпут. Кэлин көрбүтэ туртаһа өлбүт эбит. Онно кыыл өлүгүн куорат тас өттүгэр таһаарарга быһаарыммыт.

Эр киһи сыһыаныгар массыынаны салайар бырааба суох массыына ыыта сылдьыбытын иһин боротокуол толорулунна. Бэрэбиэркэ ыытыллар.