250 тыһ. Саха сирин олохтооҕо грипп утары быһыыны ылла

Өрөспүүбүлүкэ 250 тыһыынча олохтооҕо грипп утары профилактическай быһыыны ылла. Бу туһунан Роспотребнадзор өрөспүүбүлүкэтээҕи управлениетын пресс-сулууспата иһитиннэрэр.

«Балаҕан ыйын 28 күнүнээҕи туругунан, грипп утары быһыыны 249 тыһыынчаттан тахса өрөспүүбүлүкэ олохтооҕо ылла, бу нэһилиэнньэ 25,9 % уонна былаан 43 % тэҥнэһэр», — диэн иһитиннэриигэ этиллэр.

108 тыһыынча оҕо уонна 141 тыһыынчаттан тахса улахан дьон быһыыны ылбытын туһунан чуолкайдаан этиллэр.

Грипп утары босхо быһыыны ылаллар: алта ыйдарыттан үөһэ саастаах оҕолор, оҕо уһуйаанын иитиллээччилэрэ, оскуола үөрэнээччилэрэ, устудьуоннар, коммунальнай өҥө, тырааныспар, үөрэх уонна медицинэ үлэһиттэрэ, социальнай тэрилтэ эмтэнээччилэрэ уонна үлэһиттэрэ, хроническай ыарыылаах, 60 саастарыттан аҕа саастаах дьон, 2-3 триместрдээх хат дьахталлар, сулууспаҕа ыҥырыллыбыттар.

Быһыыны олорор, эбэтэр үлэлиир сиргинэн балыыһаларга ылыахха сөп. Маны таһынан, көһө сылдьар быһыы биригээдэлэрэ үлэлииллэр.