300-тэн тахса киһи вакциналанна

Коронавируһу утары вакцинаны Саха сирин 300-тэн тахса олохтооҕо ылла. Бу туһунан доруобуйа харыстабылын миниистирэ Елена Борисова иһитиннэрдэ. «Бүгүҥҥү күҥҥэ уопсайа 1800 киһи быһыыламмыт, 324 киһи толору кууруһу ааспыт», – диэтэ кини. Саха сиригэр вакцина кэннэ доруобуйалара мөлтөөбүт киһи суох. Сорохтор кыратык кыраадыстара тахсыбыт, сүһүөхтэрэ тыыппыт.

«Билигин вакциналааһыҥҥа суруйабыт. Судаарыстыбаннай эрэ медицинскэй тэрилтэлэргэ быһыыны оҥоруохтара. Тыһыынчаттан тахса киһилээх сайаапка баар буоллаҕына, тэрилтэлэргэ биригээдэ баран айанныаҕа», – диэтэ Елена Борисова.

Миниистир вакциналаммыт дьон судаарыстыбаннай өҥө порталыгар киирэн доруобуйа дневнигин толорорго сүбэлээтэ.