39 киһини сүһүрдүбүт киһи 20 тыһыынча солкуобай ыстараапка тардылынна

Чурапчы улууһугар 39 киһини сүһүрдүбүт аһыыр сир хаһаайына, 20 тыһыынча солкуобай ыстараапка тардылынна. Бу туһунан Россия Силиэстийэлиир кэмитиэтин Саха сиринээҕи Силиэстийэлиир управлениета иһитиннэрдэ.

2019 сыл ыам ыйыгар Чурапчы сэлиэнньэтигэр олорор эдэр киһи, бэйэтин кафетыгар шаурма оҥоруутун уонна атыытын тэрийбит диэн этиллэр.

«Бу бородууксуйаны сиэн баран, 39 киһи, ол иһигэр 11 сокуоннай сааһын туола илик оҕо, сальмонелла инфексията уонна сүһүрдүү сибикилээх балыыһаҕа киирбит», — диэн этиллэр.

Суут быһаарыытынан эр киһиэхэ 20 тыһыынча солкуобай кээмэйдээх ыстараап анаммыт.

Инники этиллибитинэн, Чурапчы улууһугар күргүөмнээх сүһүрдүү тахсыытынан холуобунай дьыала тэриллибитэ.