5 №дээх оҕо спорт оскуолата 20 сылын бэлиэтиир

Бу күннэргэ 5 №-дээх оҕо спорт оскуолата тэриллибитэ 20 сылын үөрүүлээх быһыыга-майгыга бэлиэтиир. Оскуолата М.К. Аммосов аатынан ХИФУ физическэй култуура уонна спорт институутун иһинэн 1999 сыл балаҕан ыйыгар тэриллибитэ.

Манна 17 улуус уонна Дьокуускай куорат оҕолоро спорт араас көрүҥэр дьарыктаналлар. 600 оҕону спорт сэттэ көрүҥэр 17 тренер дьарыктыыр. Бу оскуолаттан 20 сыл иһигэр аан дойду, Европа, Россия чөмпүйүөннэрэ, араас таһымнаах турнирдар призердара иитиллэн таҕыстылар. Үнүбэрситиэт спорка базатыгар эрчиллэн, буһуу-хатыы оскуолатын аастылар.

Спорт оскуолатын сүрүн сыала-соруга маассабас, элбэх оҕо спордунан дьарыктанарын, оҕолор чэгиэн-чэбдик туруктаах буолалларын ситиһии. Онтон, дьоҕурдаах өттүлэрэ өрөспүүбүлүкэ сүүмэрдэммит хамаандатыгар киирэн, улахан күрэхтэһиилэргэ кыттан, тапталлаах Сахаларын сиригэр кыайыылары аҕалар соруктаахтар.