Ааспыт сууккаҕа Саха сиригэр 215 киһи коронавирустаата

Саха сиригэр ааспыт сууккаҕа 215 киһи эбии коронавирустаата. Бу туһунан өрөспүүбүлүкэтээҕи суһал штаб салайааччытын солбуйааччы Ольга Балабкина бүгүн, ахсынньы 4 күнүнээҕи брифинг кэмигэр иһитиннэрдэ.

«Ахсынньы 4 күнүгэр, өрөспүүбүлүкэҕэ 215 киһи коронавирустаата, Дьокуускайга — 113. Алдаҥҥа, Миирнэйгэ, Нерюнгрига, Мэҥэ Хаҥаласка уонна Ленскэйгэ элбэх киһи ыалдьыыта бэлиэтэннэ. Бииртэн биэскэ диэри киһи 23 улууска ыарыйда», — диэтэ кини.

Өрөспүүбүлүкэтээҕи суһал штаб иһитиннэрэринэн, уопсай ыалдьыбыт дьон ахсааныттан 45 киһи ыарыыны илдьэ сылдьааччы буолар.

Алдаҥҥа — 11, Миирнэйгэ — тоҕус, Нерюнгрига — аҕыс, Мэҥэ Хаҥаласка — сэттэ, Ленскэйгэ — алта киһи ыарыйда. Аммаҕа, Үөһээ Дьааҥыга уонна Эдьигээҥҥэ биэс киһи, Үөһээ Бүлүүгэ, Горнайга уонна Чурапчыга — түөртүү, Аллайыахаҕа, Намҥа уонна Аллараа Халымаҕа — үстүү киһи эбии коронавирустаата.

Кэбээйигэ, Муомаҕа, Ньурбаҕа, Өймөкөөҥҥө, Өлүөхүмэҕэ, Сунтаарга, Уус Майаҕа уонна Хаҥаласка иккилии киһи ыалдьыбыта бэлиэтэннэ. Булуҥҥа, Өлөөҥҥө, Тааттаҕа, Уус Алдаҥҥа уонна Усуйаанаҕа — биирдии киһи ыарыйда.

Суукка иһигэр лабораторияҕа 4 194 анаалыс, пандемия саҕаланыаҕыттан уопсайа 795 329 тест оҥоһулунна.