Ааспыт сууккаҕа Саха сиригэр 218 киһи коронавирустаата

Саха сиригэр ааспыт сууккаҕа 218 киһи эбии коронавирустаата. Бу туһунан суһал штаб иһитиннэрэр.

«Сэтинньи 21 күнүгэр COVID-19 анаалыһа бигэргэммит 218 киһи бэлиэтэннэ», — диэн иһитиннэриигэ этиллэр.

Ол курдук, Дьокуускайга — 119; Бүлүүгэ — 11; Алдаҥҥа, Сунтаарга уонна Уус Майаҕа — алталыы; Үөһээ Бүлүүгэ, Горнайга уонна Ньурбаҕа — биэстии киһи ыарыйда.

Аммаҕа, Өймөкөөҥҥө,Өлүөхүмэҕэ, Өлөөҥҥө, Уус Алдаҥҥа, Хаҥаласка уонна Чурапчыга — түөртүү, Анаабырга, Үөһээ Дьааҥыга уонна Миирнэйгэ — үстүү, Аллайыахаҕа, Эдьигээҥҥэ, Ленскэйгэ, Мэҥэ Хаҥаласка, Нерюнгрига, Тааттаҕа уонна Усуйаанаҕа — иккилии киһи ыалдьыбыта бэлиэтэннэ.

Үөһээ Халымаҕа, Намҥа, Орто Халымаҕа уонна Томпоҕо биирдии киһи ыарыйда.

Ааспыт сууккаҕа Саха сиригэр биир киһи коронавирустан тыына быһынна.